Янги йил дастурхони учун тухум шаклида «холодец» тайёрлаб кўринг

Ўзига хос кўриниши билан иштаҳани очиб юборувчи «холодец» таоми байрам дастурхони учун ажойиб танловдир.

Керакли маҳсулотлар:

• Желатин кукуни − 5 чой қошиқ;
• Товуқ гўшти бульони − 400 мг;
• Тухум − 10 дона;
• Дудланган гўшт − 300 грамм;
• Қизил булғори қалампири − 1/2 дона;
• Маккажўхори доначалари − 5 ош қошиқ.
• Петрушка, туз ва зираворлар.

1. Желатин 150 мл бульонда 20-30 дақиқа давомида ивитиб олинади.
2. Тухумларнинг бир томони тешилиб, ичидан оқ ва сариғи чиқариб олинади. Тухум қобиқлари яхшилаб ювилади.
3. Дудланган гўшт ва булғори қалампири тўртбурчак шаклда тўғралади. Петрушка япроқлари ажратиб олинади.
4. Ҳар бир тухум қобиғига петрушка, дудланган гўшт, булғори қалампири ва маккажўхори доначалари жойлаштирилади. Тухумлар ичи зич бўлиб кетмаслиги керак.
5. Ивитилган желатин печда бироз иситилиб, ортиб қолган бульон билан аралаштирилади. Сўнгра тухум қобиғи ичига қуйилади. 3-4 соатга музлаткичга қўйилади.
6. Тайёр бўлган «холодец»лар тухум пўстидан эҳтиёткорлик билан чиқариб олинади ва дастурхонга тортилади.