Қоринда оғриқ тез-тез кузатилиши мумкин. Шифокорлар бундай вақтда турли оғриқ қолдирувчи препаратлар қабул қилмасликни тавсия қилади. Агар оғриқ қайт қилиш ёки қуйида келтирилган бошқа симптомлар билан бирга кузатиладиган бўлса, шифокорга бориш ёки тез ёрдам чақиришни ортга сурмаслик керак.
Кучли оғриқдан тер босади
Агар сиздаги оғриқ шунчалик кучлилигидан тер босиши кузатиладиган бўлса, зудлик билан шифокорга мурожаат қилишингиз керак. Терлаш организм стрессни бошдан кечираётганидан дарак беради.
Қайт қилиш ва қон аралаш диарея
Ян бир ёмон белги бу қайт қилиш ва қон аралаш диарея ҳисобланади. Бунда қон қизил ёки қора бўлишидан қатъи назар, ёрдам кераклигини билдиради.
Оғриқ тананинг бошқа қисмида ҳам кузатилади
Тананинг юқори қисмига ҳам берадиган қориндаги оғриқ — юрак хуружидан дарак берадиган яна бир аломат. Агар оғриқ умуртқа поғонасига берадиган бўлса, муаммо ошқозон ости безида яллиғланиш борлиги ва ярадан далолат бўлиши мумкин. Нима бўлган тақдирда ҳам, оғриқ бошқа тана соҳасида акс этадиган бўлса, шифокорга боришни ортга сурмаслик керак.
Юқори ҳарорат
Ҳарорат кўтарилиши инфекция ривожланаётганидан дарак беради. Бу вируслар хавфсиз бўлиши ҳам мумкиндир, аммо қанчалик хавфли ёки йўқлигини фақат шифокор аниқлай олади. Шу сабаб қоринда оғриқ билан бирга ҳарорат кўтарилиши кузатилса, зудлик билан шифокорга мурожаат қилинг.
Оғриқнинг ростдан ҳам кучли экани
Кучли оғриқ кузатиладиган, хусусан, аста-секин умуртқага берадиган бўлса, дарҳол шифокорни чақиринг. Бундай оғриқ қонни тананинг юқори қисмига етказиб берадиган аортада муаммо борлигини билдиради. Агар зарур чоралар кўрилмаса, бу ногиронлик ёки ўлимга ҳам олиб келиши мумкин.
Оғриқнинг нафас олишга халал бериши
Агар оғриқ нафас қисиши билан кузатилса ёки нафас етмай қолса, бу ҳолат ҳам шифокорга мурожаат қилиш кераклигини билдиради. Чунки нафас қисиши юрак хуружи ривожланаётганининг белгиси бўлиши ҳам мумкин ва бунда ҳар бир дақиқа ҳисобли бўлиши мумкин.
Оғриқ доимий қайт қилиш билан бирга кузатилса
Баъзи вақтда қайт қилгандан кейин инсон ўзини енгил ҳис қилиши мумкин, аммо бу мунтазам ёки тез-тез кузатилса, жиддий касалликдан дарак беради. Бундан ташқари, доимий ёки тез-тез кузатиладиган қайт қилиш организмни сувсизланишга олиб келиши мумкин ва бу салбий оқибатларга етаклаши мумкин.
Тери ранги сарғаяди
Тери ранги сарғайиши кузатиладиган бўлса, шифокорга мурожаат қилинг, чунки бу жигар ёки ўт пуфакдаги муаммо билан боғлиқ бўлиши мумкин. Зудлик билан зарур чораларни кўриш керак.
Оғриқнинг сабабини билмаслик
Аксари ҳолларда оғриқ овқатланишнинг меъёрда бўлмаслиги, парҳезнинг бузилиши ва бошқалар кузатилиши мумкин. Аммо оғриқ йўқ жойдан кузатилса, дарҳол мутахассис қабулига ёзилинг.
Қандли диабет
Қандли диабет инсульт ёки юрак қон-томир касалликларининг ривожланишига сабаб бўлади. Агар сизга диабет ташхиси қўйилган бўлса ва қориннинг юқори қисмида оғриқ ҳис қиладиган бўлсангиз, шифокорга боришни кечга сурманг. Чунки бу ҳали симптомлари намоён бўлмаган юрак хуружидан дарак бериши мумкин.
Овқатланишдан ва спиртли ичимликлар истеъмолидан кейин оғриқ пайдо бўлиши
Қориннинг юқори соҳасида овқатлангандан кейин дарҳол намоён бўладиган оғриқ ошқозон ости безининг яллиғланиши оқибатида келиб чиқадиган жиддий касаллик – панкреатитга хос симптомлардан бири. Агар вақтида уни даволаш ишлари бошланмаса, бу ногиронлик, ҳатто ўлимга олиб келиши мумкин.
Изоҳ (0)