Ижарадаги уй, машиналар, француз гўзали ва миллионлаб даромад. Килиан Мбаппе қандай ҳаёт кечиради?

2020 йилниг 20 декабрида 22 ёшга тўладиган Килиан Мбаппе ёш бўлишига қарамай бутун дунё бўйлаб кўплаб мухлисларига эга. Табиийки, уларни Мбаппенинг майдондаги ҳаракатларидан ташқари унинг шахсий ҳаёти ва яшаш тарзи ҳам қизиқтиради. Қуйида аллақачон ёш футболчилар қаторидан чиқарилиб, ҳақиқий юлдуз мақомини олган Килиан Мбаппенинг қандай ҳаёт кечириши ҳақида ҳикоя қиламиз.

Мбаппе қаерда яшайди?

Парижга кўчиб ўтганидан сўнг Мбаппе дастлаб меҳмонхонада яшарди. Аммо кейинчалик у ўзига Парижнинг обрўли ҳудудларидан саналмиш 16-округдан ҳашаматли уй топишга муваффақ бўлди. Уйдан 600 квадрат метрлик масофада Эйфель минораси жойлашган.

Мбаппе ушбу кошонада ижара асосида яшайди. Кўпчилик буни унинг Парижни тарк этиш ниятида эканлиги билан боғлайди.

Умуман олганда, Мбаппе ўзига хос ҳаёт тарзини олиб боради ва кўп ҳам шовқинли тадбирларга ташриф буюравермайди.

«Келажакда болаларим мендан ёшликдаги саргузаштларим ҳақида сўраса, уларга айтадиган ҳеч нарса йўқ», — деб ҳазиломуз жавоб берганди Мбаппе яшаш тарзи ҳақидаги саволга.

Мбаппенинг машиналари

«Монако»да ўйнаган кезлари Мбаппениннг шахсий автомобили бўлмаган ва одатда жамоадошларидан уйига олиб бориб қўйишни сўрарди. ПСЖга ўтганидан сўнг эса футболчи ўзининг мини-автопаркига асос солди.

Мбаппе дастлаб 35 минг долларга Audi Q3 сотиб олди.

Унин кейинги хариди 250 минг долларлик Ferrari California Т бўлди.

Унинг (ҳозирча) энг охирги хариди эса 50 минг долларлик Range Rover Evoque бўлиб турибди.

Мбаппенинг шахсий ҳаёти

Килиан Мбаппе бугунги кунда «Франция гўзали —2017» ғолиби Алисия Айлис билан яқин муносабатларда. Жуфтлик ҳозирча муносабатларини расмийлаштириш ҳақида ўйлаётгани йўқ. Алисия ҳуқуқшунослик соҳасида ўқийди ва келажакда адвокат бўлишни режалаштирмоқда. У Килиан билан тенгдош (1998 йилда туғилган.)

Мбаппенинг дўстлари ким?

Болалигида Мбаппе бутун вақтини футболга бағишлагани учун деярли дўстлар орттирмаган. Аммо у ПСЖда ҳам мураббийига айланган самимий Буффон билан дўстлашди.

Бундан ташқари у ПСЖнинг бошқа бир юлдузи Неймар билан ҳам яхши муносабатларга эга.

Жижи ПСЖдан кетганидан кейин эса уларнинг Неймар билан дўстлиги янада мустаҳкамланди.

Мбаппенинг даромади қанча?

Мбаппенинг ПСЖдаги бир йиллик маоши 18 миллион еврони ташкил қилади. Унинг клуб билан шартномаси 2022 йилгача мўлжалланган. ПСЖ унга йилига 32 миллион евро маошли янги шартнома таклиф қилаётганига қарамай у омадини бошқа чемпионатларда синаб кўрмоқчи.

Бироқ барчага маълумки, футбол юлдузларининг даромад манбайи фақат маош билан чекланмаган. Шу жумладан, Мбаппе ҳам кўплаб дунёга машҳур брендларнинг рекламаларида фаол қатнашиб келади. Бунга унинг Nike ва Hublot соатларини ишлаб чиқарадиган компаниялар билан тузган шартномалари яққол мисол бўлади.