«Бунёдкор» раҳбарияти клубда сўнгги 3 йилда иқтисодий жиноятлар юз бергани юзасидан Президент порталига мурожаат қилган. Ишни прокуратура кўриб чиқмоқда

«Бунёдкор» футбол клуби раҳбарияти сўнгги уч йилда юз берган иқтисодий жиноятлар масаласини кўриб чиқишни сўраб Президент порталига мурожаат қилган, дея хабар қилмоқда «Championat.asia».

Таъкидланишича, бунда гап катта миқдордаги пулларни ўзлаштириш ҳақида бораётган бўлиши мумкин. Клуб бухгалтерияси смета доирасида ажратилган маблағларни ўзлаштириб келганлиги айтилмоқда.

Портал мазкур мурожаатни кўриб чиқиш учун Ўзбекистон футбол ассоциациясига (ЎФА) юборган. ЎФА эса қонун доирасида ушбу ишни ҳуқуқни муҳофаза қилувчи органга оширган. ЎФА ходимининг нашрга бу ишни Бош прокуратура кўриб чиқишини маълум қилган.

«Дарё» ушбу масала юзасидан Бош прокуратурадан изоҳ олишга уринди. Ташкилот матбуот хизмати раҳбари Ҳаёт Шамсутдинов эса «Бунёдкор» раҳбарияти мурожаати билан айни дамда Тошкент шаҳар прокуратураси шуғулланётганини маълум қилди.

Маълумот учун, 2020 йилнинг август ойида «Бунёдкор» бош директори Улуғбек Мирзаев ўз лавозимидан озод этилганди. Мирзаев 2019 йилнинг январидан буён ушбу лавозимда ишлаб келаётганди. Ундан аввал Мурод Алиев 2017 йилнинг май ойидан 2019 йилнинг январига қадар «Бунёдкор» бош директорлиги лавозимида фаолият юритган. Айни вақтда Айниддин Ғиёсов клуб бош директорлиги вазифасини бажарувчи сифатида фаолият олиб бормоқда. Клуб ҳозирда Давлат активларини бошқариш агентлиги тасарруфида бўлиб турибди.

Қайд этиш жоиз, «Бунёдкор» жамоаси 2020 йилда молиявий қийинчиликларни бошдан кечирмоқда. Аввалроқ клуб Жасур Жалолиддиновнинг «Локомотив»га трансфери борасида ҳам можароли вазиятга учраганди.

Мавзуга доир:

• «Жалолиддинов иши»: «Бунёдкор» ва «Локомотив» ўртасидаги воситачилар 550 минг еврони ўзлаштирган
• «Бунёдкор» Жасур Жалолиддинов трансферидан тушган пулни ишлата олмаётгани маълум бўлди