Жаҳон юлдузлари ҳамиша жамоатчилик назорати остида. Баъзан оддийгина камераларнинг чироғи даҳшатли оқибатларга олиб келиши эса ҳеч кимнинг хаёлига ҳам келмайди.
Малика Диана
Малика Диананинг бевақт ўлими нафақат қирол оиласи аъзолари, балки бутун дунё учун кутилмаган воқеа бўлди. 1997 йил 31 августда Парижда оддий инсонлар каби қалбга эга Диана ва миллиардернинг ўғли Доди Ал-Фаед иштирокида бахтсиз ҳодиса юз берган эди. Жуфтлик ўтирган машина ҳайдовчиси сураткашлардан қочиш мақсадида тезликни оширган ва бошқарувни йўқотиб, Алма кўприги яқинидаги туннел таянчига бориб урилган. Шаҳзода Чарльзнинг собиқ рафиқаси Диана ҳамда унинг дўсти Доди Ал-Фаед ҳам оғир тан жароҳати туфайли вафот этган.
Дэвид Бекхем
2013 йилда суратга олишга ҳаракат қилаётган сураткашларнинг айби билан яна бир бахтсиз ҳодиса юз берган. Дэвид Бекхем татуировка салонидан мотоциклда чиқаётганида сураткашлар уни аллақачон кутиб турган эди. Таъқибдан тезда халос бўлишни истаган футболчи бошқарувни йўқотиб, ҳалокатга учраган. Спортчи фақат кўкарган жароҳатлар билан қутулиб қолган бўлса-да, аммо унинг мотоциклдан йиқилган ҳолати акс этган суратлар ўша заҳоти интернетда пайдо бўлган.
Селена Гомес
2014 йилда Селена Гомеснинг йўлтанламас машинаси уни таъқиб қилаётган сураткашлар машинаси билан тўқнашган. Ҳодиса юлдуз автотураргоҳдан чиқиб кетаётганида тўсатдан юз берган. Қизиғи шундаки, воқеа жойида сураткашлар юлдузнинг аҳволи билан қизиқмай, унинг саросимага тушган юзини суратга олиш билан овора бўлган. Дарҳол интернет оламида юлдузнинг воқеа жойида олинган суратлари пайдо бўлган.
Николь Кидман
Етти йил муқаддам сураткашлар Николь Кидманнинг ажойиб суратини олишга муваффақ бўлган. Тезроқ суратга олишга шошилган сураткашлардан бири актрисани меҳмонхона яқинида велосипедида уриб юборган. Ўша вақтда актриса Нью-Йорк мода ҳафталигининг навбатдаги шоусидан қайтиб келаётган эди. Кучли зарбага у баланд пошнадалиги туфайли қаршилик кўрсата олмаган. Натижада тўпиғига шикаст етган. Омадсиз фотосуратчи дарҳол меҳмонхона хавфсизлиги ходимлари томонидан қўлга олиниб, полицияга топширилган.
Жастин Бибер
Жастин Бибер ҳам собиқ севгилиси Селена Гомес каби таъқибчилардан қочиб, бахтсиз ҳодисага учраган. 2014 йил қўшиқчи мунтазам ташриф буюрадиган ресторан олдида кутилмаган воқеа юз берган. Автотураргоҳни тезроқ тарк этиш мақсадида Жастиннинг ҳайдовчиси тезликни оширган ва шу пайт бошқа машинани уриб юборган. Автоҳалокатдан ҳеч ким жароҳат олмаган, аммо машиналар жиддий зарар кўрган.
Изоҳ (0)