«Ювентус» Чемпионлар Лигаси 4-турида «Ференцварош» билан баҳс юритди. Туринда бўлиб ўтган ўйин 2:1 ҳисобида мезбонларнинг ғалабаси билан тугади.
«Ювентус»нинг асосий таркибидан бирорта ҳам италиялик ҳимоячи ёки дарвозабон ўрин олмади. Бунақаси клубнинг 123 йиллик тарихида илк бор кузатилди, дея хабар қилмоқда Football Italia. Шу билан бирга бутун ўйин давомида бу чизиқларда италиялик ўйинчи ҳаракат қилмади.
Бунга қадар «Ювентус» 4371 та ўйин ўтказган ва уларнинг барчасида ҳеч бўлмаганда бир нафар италиялик ҳимоячи ёки дарвозабон асосий таркибда майдонга тушган.
Бундай ҳолат ҳимоячилар Леонардо Бонуччи ва Жоржио Кьеллинининг жароҳати сабаб юзага келди. Бундан ташқари, туринликлар устози Андреа Пирло асосий таркибда Жанлуижи Буффонга эмас полшалик дарвозабон Войцеҳ Шенснига ишонч билдирди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)