Қашқадарё вилоятининг Яккабоғ туманида уч кун чироқ ўчгани сабаб тадбиркор 5200 та товуғидан айрилган. Бу ҳақда дастлаб яккабоғлик блогер Камил Фахрутдинов маълум қилди.
Фото: Камил Фахрутдинов
Таъкидланишича, Яккабоғ туманида 18—20 ноябрь кунлари электр токи бўлмаган.
«Дарё» мухбири билан суҳбатлашган тадбиркор Абдунаби Ғиёсов айни кунга келиб ўлган товуқлари сони 6000 тага етганини билдирди.
Фото: Камил Фахрутдинов
«Аммо бунда ўзимизнинг ҳам камчилигимиз бўлган, — дейди тадбиркор Абдунаби Ғиёсов. — ‘Движоғимиз ёнилғиси сифатсиз бўлгани сабаб музлаган ва ёнмаган. Оқибатда паррандалар сақланадиган бинодаги ҳавони тортиб турадиган ускунамиз ишламай қолган. Товуқларнинг ўзидан чиқадиган аммиак гази тоза ҳавога чиқарилмагани боис паррандаларимиз нобуд бўлган. Аммо 400 мингдан ортиқ товуқларимиз бор. Насиб этса, зарарни қоплаймиз. Бу ҳақда ёзиш шартмас».
Тадбиркор зарари ҳақида ёзган блогер Отабек Артиков «Чироқнинг чекловини камайтиринг, агар ўша халқнинг ҳам товуқчалик қадри бўлса. Бешикда чақалоқлар бор, тўшакда ётган қария касалмандлар бор, уларни музлатманг, илтимос», деб ёзса, блогер Ҳусан Комилжонов тадбиркор вазирликка мурожаат қилганидан сўнг унга электр токи берилганини ва туманда электр энергияга киритилган чеклов камайганини билдирган. Журналист Ўрал Камолов тадбиркор компенсация сўраб судга мурожаат қилиши кераклигини, Энергетика вазирлиги эса тадбиркор зарарини қоплаб бериши лозимлигини ёзган.
Эслатиб ўтамиз, республика бўйлаб электр чироқлари билан боғлиқ муаммолар юзага келгани сабаб Танзила Норбоева газ ва электр муаммоси махсус кўриб чиқилиши, ялпи мажлисда кўтарилиши, Президентга ахборот берилишини айтди. Энергетика вазирлиги Ўзбекистонда электр энергияси таъминотидаги узилишларнинг асосий сабаби ҳавонинг совиб кетиши натижасида электр энергияси истеъмолининг кескин ортиши эканлигини маълум қилди.
