Тошкент шаҳар прокурорининг ташаббуси билан 2020 йил 12 ноябрдан 4 декабрь кунлари мобайнида Тошкент шаҳрининг барча туманларида ишсиз фуқароларни ишга жойлаштиришга кўмаклашиш мақсадида меҳнат ярмаркалари ўтказилмоқда.

Бугунги кунга қадар Яшнобод, Миробод ва Мирзо Улуғбек туманларида ўтказилган тадбирларда 72 та корхона ва ташкилотлар 2210 та бўш иш ўринлари билан иштирок этган.

Меҳнат ярмаркаларига 336 нафар фуқаро қатнашиб, шундан, 70 нафарига ишга жойлашиш бўйича йўлланмалар берилди, 24 нафари касбга ўқитиш ва қайта тайёрлаш ўқув курсига жалб этилди, 36 нафар фуқаро билан меҳнат шартномалари тузилиши таъминланди.

Шунингдек, Яшнобод туманида ўтказилган тадбирда Бирлашган Араб Амирлигининг Caneed корхонаси чет элда ишлаш бўйича 200 та бўш иш ўрни билан қатнашмоқда.

Бундан ташқари, шаҳар прокуратурасининг 99-030-07-47 рақамига очилган Telegram канали орқали ишга жойлаштириш масалалари бўйича мурожаатлар қабул қилинмоқда.

Шу билан бирга, тадбир қатнашчиларига шаҳар прокуратураси томонидан тайёрланган меҳнат муносабатларига оид қонун ва норматив-ҳуқуқий ҳужжатларни тушунтириш бўйича тайёрланган рисолавий букет тарқатилди.

Ўтказилаётган меҳнат ярмаркалари ҳақида маълумотлар ish.mehnat.uz сайти орқали кенг ёритиб борилмоқда.

Меҳнат ярмаркалари давом эттирилмоқда.

Маълумот шериклик ҳуқуқи асосида тайёрланди.