Ўзбекистонга хориждан юбориладиган пул ўтказмалари ўтган йилга нисбатан 148 млн долларга камайди

Ўзбекистон Марказий банки 2020 йил январь—октябрь давомида мамлакатда амалга оширилган трансчегаравий пул ўтказмалари тўғрисида маълумот берди.

Қайд этилишича, бу вақт давомида республикага келиб тушган трансчегаравий пул ўтказмалари ҳажми 4,88 миллиард долларни ташкил этиб, ўтган йилнинг мос даврига нисбатан 148 миллион долларга ёки 3 фоизга камайди.

Чет элга юборилган трансчегаравий пул ўтказмалари миқдори эса 934 миллион долларга етиб, ўтган йилнинг мос даврига нисбатан 67 миллион доллар ёки 8 фоизга ошди.

Натижада трансчегаравий пул ўтказмалари бўйича ижобий салдо 3,95 миллиард долларга етган.

Аввал Ўзбекистонда нақд пул тушумларининг ҳажми коронавирус эпидемиясидан аввалги даражасини тиклаётгани ҳақида хабар берилганди.