Тошкент вилояти Юқумли касалликлар шифохонаси мансабдор шахсларига нисбатан Чирчиқ шаҳар прокуратураси томонидан олиб борилаётган дастлабки тергов ҳаракатлари айблов хулосаси билан тамомланиб, мазмунан кўриб чиқиш учун Жиноят ишлари бўйича Чирчиқ шаҳар судига юборилди. Бу ҳақда Бош прокуратура «Дарё»га хабар қилди.
Маълум бўлишича, терговда дастлабки эълон қилинган айблов тўлдирилиб, Г.Йўлдошева ҳамда яна 4 кишига нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш), 209-моддаси 2-қисми «а» банди (такроран ёки хавфли рецидивист томонидан содир этилган мансаб сохтакорлиги), 25-167-моддаси 3-қисми «а» банди, 207-моддаси 3-қисми «а» банди (одам ўлишига сабаб бўлган мансабга совуққонлик билан қараш) билан айб эълон қилинган.
«Kun.uz»нинг маълум қилишича, Г.Йўлдошеванинг адвокати Хушнуд Аҳроров унинг ҳимояси остидаги шахс эълон қилинган айбловларга иқрор эмаслигини, ўзининг айбсиз эканлигини ва барча эътирозларини судда баён этишини айтган.
Жиноят иши бўйича суд муҳокамалари қачон бошланиши ҳозирча маълум қилинмаган.
Эслатиб ўтамиз, коронавирусга чалинган бемор ўлими ва 250 миллион сўм бюджет маблағларини талон-торож қилганликда айбланиб қамоққа олинган Тошкент вилояти бош инфекционисти Гулжаҳон Йўлдошевага нисбатан жиноят иши 2020 йил 11 августда Чирчиқ шаҳар прокуратураси томонидан қўзғатилган. 8 сентябрга келиб, эҳтиёт чораси сифатида айбланувчи қамоққа олинган эди.
Унинг қамоққа олиниши жамоатчилик ўртасида кенг муҳокамаларга сабаб бўлди. Бир қатор давлат ва нодавлат ташкилотларнинг раҳбарлари, хусусан, Сенат раиси Танзила Норбоева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева мазкур ҳодисага муносабат билдириб, прокуратурани шифокорга нисбатан қўлланилган эҳтиёт чораси ўзгартиришга чақирган.
Шундан сўнг, Гулжаҳон Йўлдошева 6 октябрь куни уй қамоғига ўтказилганди.
Изоҳ (0)