Ўзбекистон Президенти Шавкат Мирзиёев суд қарорлари ижросини таъминлаш масалалари юзасидан видеоселектор йиғилиши ўтказмоқда, деб хабар бермоқда Президент матбуот хизмати.
Йиғилиш аввалида мамлакатда коронавирус пандемияси билан боғлиқ вазият таҳлил қилинди.
Қайд этилишича, ўтган 8 ой мобайнида COVID-19’га қарши курашишда етарли тажриба тўпланган, тиббиёт ходимлари ҳам зарурий малакага эга бўлган.
«Касаллик занжири»ни жиддий назорат қилган ҳолда карантин талаблари босқичма-босқич енгиллаштирилгани таъкидланди. Аммо дунё мамлакатларидаги, қўшни давлатлардаги ҳолатни инобатга олиб, Ўзбекистонда бу касалликка қарши курашишни бир дақиқага ҳам тўхтатиб бўлмаслиги, чунки хавф-хатар ҳали ўтиб кетмагани айтиб ўтилди.
Мамлакатда ҳозирги пайтга қадар ушбу вирус билан касалланганлар сони 70 минг нафардан ортгани, тузалганлар сони қарийб 68 минг (96 фоиз), ўлим кўрсаткичи 599 нафарни (0,9 фоиз) ташкил этаётгани қайд этилди.
Ҳокимлар, секторлар раҳбарлари ва соғлиқни сақлаш тизими мутасаддиларига қатор вазифалар юклатилди.
Аввало коронавирус билан боғлиқ вазият доимий равишда жиддий таҳлил қилиниши, керакли хулосалар чиқарилиши лозим. Хусусан, ҳафтада камида икки кун ҳудуддаги пандемияга оид ҳолат билан алоҳида шуғулланиб, штаб йиғилиши ўтказилиши, мунтазам равишда Республика махсус комиссиясига шахсан ҳисобот берилиши белгиланди.
«Яна бир марта таъкидлайман, бу касаллик бефарқликни асло кечирмайди. Шу билан бирга, биз коронавирус пайтида тўплаган катта тажрибамиз ва олган чуқур хулосаларимиз асосида муносиб яшаш ва ишлашда давом этишимиз керак», — деди Шавкат Мирзиёев.
Изоҳ (0)