Ижтимоий тармоқларда Қашқадарё вилояти маъмурий маркази Қарши шаҳрида йўл бўйидаги чимлар яшил рангга бўяб чиқилаётгани акс этган фото ва видеолар тарқалди. Қайд этиш жоиз, 12 ноябрь куни Президент Шавкат Мирзиёев ҳудуддаги ўзгаришлар билан танишиш мақсадида Қашқадарё вилоятига жўнаб кетган.

Қарши шаҳридаги ободонлаштириш хизмати ходими совуқда сарғайиб қолган чимларни яшил рангга бўяб чиқмоқда.

Фото: Telegram

Жамоатчилик вакиллари, хусусан, блогерлар Қашқадарёда Президент ташрифи арафасида чимларнинг бўяб чиқилаётганини қоралаб, буни кўзбўямачилик ҳолати деб эътироф этган. «Яхшиям бугун ёмғир. Табиатнинг ўзи ёлғонни ювишга ёрдам беради», — деб ҳолатга муносабат билдирган «Микрофон кўтарган аёл» канали муаллифи.

Telegram’даги «Наблюдения под чинарой» канали муаллифи эса вазиятни ҳазил аралаш, киноя билан шундай изоҳлаган: «Ҳамма ерда шундай бўлсайди — иқтисодиётни, эпидемия ва коррупцияни бирор ёқимли рангга бўясак. Суратни бор ҳақиқатни айтиб, мамлакатимиз шаънини булғамоқчи бўлган Россия ва АҚШ махсус хизматларининг жосуслари юборди».

2017 йил мартида, Президент Шавкат Мирзиёевнинг Самарқанд вилоятига ташрифи арафасида кўча тозалаш ишларига жалб қилинган ўқитувчи Диана Еникеева ЙТҲ оқибатида вафот этган эди; жамоатчилик ўқитувчининг ўлимига сабаб бўлган тозалаш ишларини кўзбўмайачилик деб атаган эди. Давлат раҳбари ҳодисага муносабат билдираркан, «юрагимда бу худдики мен туфайли юз бергандек туюлди» деган, «ўзи шундай ишларга қарши бўлгани»ни алоҳида таъкидлаган эди.

«Мен осмондан пайдо бўлиб, тушиб келмайман: бир кун олдин қайси вилоятга ташриф буюришим ҳақида маълумот етказилади. Лекин, кўп жойларда кўзбўямачиликка йўл қўйилмоқда. Очиғи, менга бу ноқулай, кўзбўямачилик менда нафрат уйғотмоқда. Ўқитувчиларни мажбурлаб чиқариб қўйиб, ободонлаштириш, уларга кўча супуртириш, «тайёргарлик»ка жалб этиш — сиёсатга хиёнат. Бу ҳаракатлар фақат менга эмас, сиёсатга ҳам хиёнат!», — деганди ўшанда Президент Шавкат Мирзиёев.

Мавзуга доир: