Месси билан ҳозирги муносабати, Рональд Куман, Бартомеу ва «Барса» дарвозасига урган голни нишонламаслиги ҳақида Луис Суарес интервьюси

«Барселона» сўнгги йилларда шу даражада катта муаммолар гирдобига тушиб қолдики, ҳатто клубни ўзидан-да яхши кўрадиган афсона Месси ҳам уни тарк этишни хоҳлаб қолди. Бироқ ана шундай бир пайтда жамоанинг бошқа бир афсонасига шунчаки чиқиш эшиклари кўрсатилди. Ҳа, бу Луис Суарес эди. Клуб очиқчасига ундан воз кечди, қўйди. Унинг шунча йиллик меҳнатлари қадрланмади...

Суареснинг майдон ва унинг ташқарисидаги энг яқин дўсти Месси унинг клубдан қувилганига норозилик билдирар экан, қуйидаги сўзларни ёзди: «Кетганингни қабул қилишни бошладим, бироқ бугун кийиниш хонасига кирдим ва ўша ерда бўлаётган воқеаларни тўлиқ ҳис қилдим. Кунни сенсиз ўтказиш нақадар қийин бўлишини англаяпман, майдонда ҳам, унинг ташқарисида ҳам. Сени жуда соғинамиз. Неча йиллик биргаликдаги тушлик ва кечки овқатланишлар...

Сени бошқа клуб либосида кўриш ғалати бўлади, сенга қарши ўйнаш эса ундан ҳам ғалати. Сен «Барселона» тарихидаги энг муҳим ўйинчилардан бири эдинг, соврин ва индивидуал ютуқларинг туфайли муносиб хайрлашишларига лойиқ эдинг. Клубдан бу каби ирғитиб юборишларига лойиқ эмас эдинг. Бироқ мени энди ҳеч нима ажаблантирмаяпти. Янги саргузаштларингда барча яхши тилакларни билдириб қоламан. Сени жуда яхши кўраман. Яқинда кўришамиз, дўстим».

Луис эса ўзига янги жамоа топишда ва унга мослашишда муаммоларга дуч келмади. У Испаниянинг бошқа бир клуби «Атлетико» сафига қўшилиб, у ерда бирданига «ўзиники» бўлиб олди ва кетма-кет голлар ура бошлади. Маҳаллий АС нашри Суаресни суҳбатга тортиб, ундан Месси билан ҳозирги муносабати, Рональд Куман ва Хосеп Бартомеу ҳақидаги фикрларини сўради. «Дарё» қуйида мазкур интервьюни ўзбек тилида тақдим этади.

Месси билан ҳозирги муносабатлари ҳақида

«Биз тез-тез гаплашиб турамиз. Аммо биз кўпроқ ҳаёт ҳақида гаплашмоқдамиз. Бугунги кунда содир бўлаётган воқеалар тўғрисида. Шу кунларда ўғилларимизнинг туғилган куни бўлди ва биз бу нарсалар ҳақида суҳбатлашдик. Бизнинг муносабатларимиз яхши ва биз фақат футбол ҳақида эмас, балки шахсий масалаларда ҳам бир-биримизга суянишга ҳаракат қиламиз».

Мессига бўлаётган танқидлар ҳақида

«У ҳозир 33 ёшда ва у ҳар қандай вазиятга қандай бардош беришни билади. Мен уни олдингидек ташна ҳолда кўряпман. У ҳамон футболдан завқланмоқда ва таслим бўлгани йўқ, муҳими шу. Чунки баъзида тўп дарвозага киришни истамаса ҳам, ҳаракат қилавериш керак. Бу у ҳақида кўп нарсани англатади».

«Барса» билан шартномаси тугаганидан кейин Леонинг «Атлетико»га ўтиши мумкинлиги ҳақида

«Месси ўзи ҳал қилиши керак бўлган қарорларни қабул қила олади. Мен ҳеч қачон ундан ҳеч нарса сўрамайман. Мен уни ҳар доим, қаерда бўлишидан қати назар ҳимоя қиламан. У ўзи хоҳлаган қарорларни қабул қилишдан хурсанд бўлади».

Рональд Куман билан муносабатлари ҳақида

«Куман билан муносабатларим профессионал бўлган. У бу ҳақида менга ўз вақтида маълум қилди (клубдан кетиши кераклигини телефон орқали айтган) ва мен унга ўзимга клуб топгунимга қадар жамоада машғулотларни давом эттириш ҳуқуқим борлигини айтдим. Уч ҳафта давомида тўлиқ профессионаллик билан машғулот ўтказдим. Мени алоҳида машғулот ўтказишга юборишди ва мен бунга ҳам кўндим, у менинг аҳволимни билгани учун буни тушунди».

Бартомеунинг истефоси ҳақида:

«Ҳақиқат шуки, «Барселона»да содир бўлаётган воқеалар мени қизиқтирмаяпти. Ҳозир «Атлетико»даман ва шу клуб шарафини ҳимоя қиляпман. «Барса»да бўлаётган воқеалардан узоқроқ бўлишни афзал кўраман».

«Барселона»га урилган голини нишонлаш, нишонламаслиги ҳақида:

«Агар «Барса»га гол урсам, жамоадошларим ва менга шунча нарса берган клубга бўлган ҳурматим туфайли уни нишонламаган бўлардим. Шубҳасиз, кўплаб дўстларим билан учрашиш бу алоҳида воқеа бўлади, аммо «Атлетико» шарафини ўлгунимча ҳимоя қиламан».