Porsche 911 Turbo S спорткари самолётга совға сифатида таклиф қилинмоқда (фото)
Германиянинг Porsche автомобилсозлик компанияси ва Бразилиянинг Embraer авиасозлик концерни Duet номли ҳамкорликдаги лойиҳасини эълон қилди, деб хабар беради Motor.
992 номли сўнгги авлодга кирувчи янги Porsche 911 Turbo S спорткарини мутлақо бепул қўлга киритиш мумкин — бунинг учун Embraer Phenom 300E самолётини сотиб олиш керак. 10 нусхада яратилган немис купеси ва самолёт Duet номини олган — бу Porsche ва фуқаролик самолётларини ишлаб чиқариш ҳажми бўйича дунёда учинчи ўринда турувчи Embraer’нинг ҳамкорлик лойиҳаси ҳисобланади. Бироқ Porsche 911 Turbo S самолётга шунчаки совға сифатида тавсия этилмайди: спорткар ва бизнес-жет ишлаб чиқарувчилар уларни максимал даражада бир-бирига ўхшаш қилиб яратган.
Уларнинг иккиси ҳам бир хил рангга бўялган: ялтироқ Platinum Silver Matalliv ва нурсиз Jey Gray Metallic ранглари комбинацияга Brilliant Chrome ва Speed Blue декоратив чизгилар қўлда сепилади. Шунингдек, Porsche Platinum Silver Metallic рангидаги эксклюзив ғилдиракларга эга бўлган, ён томондаги ҳаво ҳайдагичлари ва ён ойна четлари Brilliant Chrome’га бўялган.
Спорткар салони икки хил чарм билан қопланган, интерьеридаги декоратив панеллар эса углерод толадан ишланган. Интерьерга One of 10 ёзувли махсус логотип туширилган, секундомер қўшимча сунъий чегара линияси билан қопланган. Шунингдек, автомобилга Remove before flight биркаси туширилган ғилоф, чамадон ва иккита Porsche Design йўл сумкаси тақдим этилади. Duet нархи тўғрисида маълумот берилмаган.
