Франциянинг Ницца шаҳрида одамларга пичоқ билан ҳужум қилган террорчи 21 ёшли тунислик эркак эканлиги маълум бўлди
Франциянинг Ницца шаҳрида пичоқ билан одамларга ҳужум қилиб, уч кишини ўлдирган одам Тунис фуқароси бўлиб чиқди. Бу ҳақда Nice Matin нашрига таяниб, «Интерфакс» хабар берди.
Маълум қилинишича, террорчи 21 ёшда бўлиб, терговчилар унинг исми Браҳим А. эканлигини айтмоқда. Полициянинг фикрича, у шерикларсиз ҳаракат қилган.
Ницца шаҳрида 29 октябрь куни эрталаб пичоқ билан қуролланган эркак Нотр-Дам ибодатхонасига кириб, қоровул ва икки нафар аёлни ўлдирган. Уларнинг барчаси бўйин соҳасида жиддий жароҳат олган. Аёллардан бири ибодатхонадан қочишга муваффақ бўлган, бироқ кейинроқ у олинган жароҳатлардан вафот этган.
Ҳужумга гувоҳ бўлган киши полицияни чақирган. Улар воқеа жойига тезлик билан етиб келган ва террорчига ўт очган. У яраланган ва ҳозирги пайтда шифохонада.
Франция президенти Эммануэль Макрон ҳодисани «ислом терроризми акти» деб атаган. Мазкур ҳужумдан кейин Франциянинг бутун ҳудудида террористик хавфнинг энг юқори даражаси эълон қилинган.
Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.
