Қашқадарё вилояти ҳокими Зоир Мирзаев интернетда шов-шувларга сабаб бўлган Чироқчидаги мактаб ҳақида гапириб, қўрқинчли синфхоналарга ўтин киритиб, жамоатчиликни алдашга уринган директорни вазифасига нолойиқ деб атади. Бу ҳақда Халқ депутатлари вилоят кенгашининг навбатдаги сессиясида сўз юритилди, дея хабар берди «Дарё» мухбири.
Таъкидланишича, 27 октябрь куни бўлиб ўтган Халқ депутатлари Қашқадарё вилоят кенгашининг навбатдаги сессиясида Ўзбекистон Республикаси Президентининг «Мамлакатимиз таълим-тарбия тизимини янада такомиллаштириш, илм-фан соҳаси ривожини жадаллаштиришга оид қўшимча чора-тадбирлар тўғрисида»ги Фармони лойиҳаси муҳокама қилинган.
Сессияда сўз олган Зоир Мирзаев Чироқчи туман халқ таълими бўлими мудири Фарҳод Жумановга юзланиб «Нимага бор ҳақиқатни яширяпсизлар?», деган бўлса, депутатларга қарата «Нимага Чироқчидан сайланган депутатлар воқеага муносабат ҳам билдирмади?» дея куйиниб гапирган.
«Қилманг бунақа ишни, ўтин киритиб қўйиб, бошқа қилиб. Кимга керак бунақа майнавозчилик? У — 61-мактаб директори вазифасига нолойиқ. Директорни телевидениеда, ОАВда чиқариш керак — интервью берсин. Қолган мактаб директорлари бундай кўзбўямачилик, спектакль қилмасин кейин. Бу ҳолат қолганларга мактаб бўлсин», — деди Зоир Мирзаев.
Вилоят раҳбари сессия иштирокчиларидан 61-мактаб ҳудудидан сайланган депутат кимлигини сўраган. «Ўша ҳудуддан сайланган депутат, балки, ҳудудингизда 61-мактаб борлигини билмассиз?», — деди вилоят ҳокими.
Сессияда иштирок этаётган депутатларнинг маълумот беришича, Шодиёр Хўжаназаров 61-мактаб жойлашган ҳудуддан вилоят кенгашига сайланган депутат бўлиб, сессияда иштирок этмаган.
Қашқадарё ҳокими сессия давомида Чироқчидаги мактаб ҳақида ёзган ОАВ вакилларига раҳмат айтиш кераклигини таъкидлаган.
«Сиз оммавий ахборот воситаларига раҳмат денг, шуни ёритиб бергани учун. Тўғри, бугун танқидий материал чиқди, эртага эрталаб ҳокимият бориб ҳал қилиб беради деган тушунчадан воз кечиш керак», деган ҳоким.
Зоир Мирзаевнинг маълумот беришича, вилоятда 300 дан ортиқ мактаб филиаллари бўлиб, уларнинг 274 тасининг кадастр ҳужжати ҳам мавжуд эмас.
«Яқинда биз барча туман ва вилоятнинг бюджетини тасдиқлаймиз. Шунда молиянинг одамидан ‘61-мактабга неча пул берасан, мана бу мактабга қанча берасан? Бу мактаб авария ҳолатида, бу мактабнинг ҳожатхонаси йўқ’ деб ким сўрайди. Депутатнинг шундай савол беришга ҳаққи борми ёки йўқми?», дея сўраган вилоят ҳокими.
Эслатиб ўтамиз, аввалроқ Чироқчидаги 61-мактабнинг қўрқинчли синфхоналарида дарс ўтилаётгани тасвирланган видео ва фотолар тарқалди. Шундан сўнг вилоят халқ таълими бошқармаси ҳамда Чироқчи туман ҳокимлиги ҳолатни рад этиб чиқди. «Дарё» мухбири билан суҳбатлашган қишлоқ аҳли эса ушбу синфхоналарда ўқувчиларга икки йил давомида дарс ўтилганини билдирди. Мактаб директори ҳам кейинчалик буни тасдиқлаб, дастлаб жамоатчиликни чалғитишга уринганини, ёлғон маълумот берганини тан олди.
Изоҳ (0)