Бухорода ҳужжатсиз машина бошқарган фуқаро ЙПХ ходимларидан қочиб, ёш болани уриб юборди

Бухоро вилоятида ЙПХ инспекторларининг «тўхташ» ишорасига бўйсунмай, улардан қочиб, тезликни оширган ҳайдовчи йўл четида копток ўйнаб турган ёш болани уриб юборди. Бу ҳақда «Дарё»га вилоят ИИБ ЙҲХБ ахборот хизмати раҳбари Улуғбек Шукруллаев маълум қилди.

Таъкидланишича, 2020 йилнинг 19 октябрь куни вилоят ИИБ Йўл ҳаракати хавфсизлиги бошқармаси ходимлари Когон шаҳри ва тумани кесишадиган А-380 автомобиль йўлининг Чоробод чорраҳасида хизмат олиб бораётган бўлган. Соат тахминан 16:30 да йўл ҳаракати қоидасини бузган ҳолда ҳаракатланиб келаётган қора рангли, «Волга» русумли 80 У 248 ҲА давлат рақам белгили транспорт воситасига тўхташ ишораси берилган. Аммо мазкур транспорт воситасини бошқараётган ҳайдовчи П.Р. ЙПХ инспекторининг қонуний талабига бўйсунмай, ҳаракатланишда давом этган.

Шундан сўнг ЙПХ инспектори томонидан алоқа воситаси ёрдамида ушбу йўналишда хизмат олиб бораётган барча ходимлар огоҳлантирилган. Мазкур транспорт воситасини тўхтатиш лозимлиги тўғрисида хабар берилган.

Транспорт воситасини бошқараётган ҳайдовчи дастлаб Когон шаҳар Амир Темур кўчаси бўйлаб ҳаракатланиб, йўналишини Элобод кўчасининг тор йўли томон ўзгартирган. Ушбу ички тор йўлда вояга етмаган болалар копток ўйнаб турганини кўриб ҳам тезликни пасайтирмаган. «Волга» ҳайдовчиси эҳтиётсизлик оқибатида вояга етмаган болалардан бирини уриб юбориб, унга тан жароҳати етказган. Ҳайдовчи жабрланувчига биринчи тиббий ёрдам кўрсатмай, ҳаракатланишда давом этган. Асосий йўлга чиққан вақтда Амир Темур кўчасида хизмат олиб бораётган ЙПХ инспекторини кўриб, ушбу инспекторнинг ҳам тўхташ ишорасига бўйсунмаган. Амир Темур кўчасидан Ватанпарвар кўчасига бурилиб, охири берк кўчанинг тугаш жойида автомашинани ташлаб қочган.

«ЙПХ ходими бизга қонуний тўхташ ишорасини берди. Ҳужжатларимиз йўқлиги сабаб тўхтамадик. Шеригимда ҳайдовчилик гувоҳномаси бўлмагани учун мен бошқариб келаётган эдим. Бир боланинг оёғини босиб олдим. Шу сабабли қўрқувимиз янаям ошди. Ўша пайтда ўзимни йўқотиб қўйгандим», — дейди фуқаро П.Р.

Олиб борилган тезкор суриштирув ҳаракатлари давомида мазкур ҳайдовчининг ёнида транспорт воситасини бошқариш ҳуқуқини берувчи ишончнома бўлмаган. Шу сабабли инспекторнинг тўхташ ишорасига бўйсунмай ҳаракатланишда давом этган.

«Фуқаронинг автомашинасини қувиб ушлаш ёки кузатув ҳаракатлари олиб борилмаганлиги аниқланди. Шунингдек, ҳодиса содир бўлган жойда чақирув асосида тергов тезкор гуруҳи ва тез тиббий ёрдам хизмати ўз вақтида етиб келиб, мазкур ҳолат белгиланган тартибда рўйхатга олинган ва тегишли тартибда расмийлаштирилган», — дейди Улуғбек Шукруллаев.

Айни пайтда ҳолат бўйича Когон шаҳар ИИБ ҳузуридаги тергов бўлинмаси томонидан терговга қадар текширув ҳаракатлари ва вилоят ИИБ томонидан хизмат текшируви ўтказилмоқда.