Халқ депутатлари Хонобод шаҳар Кенгашининг навбатдан ташқари сессиясида Машъал Тожибоев шаҳарнинг янги ҳокимилигига тасдиқланган. Бу ҳақда «Дарё» мухбири Умиджон Мамарасулов хабар берди.
Таъкидланишича, Машъал Тожибоев Андижон шаҳрида туғилган бўлиб, 2007 йилда Тошкент архитектура ва қурилиш институтини, 2015 йилда Президент ҳузуридаги Давлат бошқаруви академиясини тамомлаган.
Иш фаолиятини 2003 йилда Андижон вилоят пудрат савдоларини ташкил этиш ва ўтказиш бошқармаси мутахассислигидан бошлаган. Турли йилларда қурилишда танлов савдолари ва нархларни шакллантириш ҳудудий консалтинг маркази етакчи мутахассиси, нархларни шакллантириш бўлими бошлиғи, «Қишлоққурилишинвест» ихтисослаштирилган шўъба инжиниринг компанияси Андижон филиали уй-жой маркетинг шўъбаси бош мутахассиси, Андижон вилоят ҳокимлиги капитал қурилиш, коммуникациялар ва ободонлаштириш масалалари бўйича котибияти етакчи мутахассиси, котибият мудири, Андижон шаҳар ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича биринчи ўринбосари лавозимларида ишлаган.
2016 йилда вақтинча Андижон шаҳар ҳокими вазифасини бажарган. Машъал Тожибоев Хонобод шаҳри ҳокими вазифасига тайинлангунга қадар Андижон вилоят уй-жой коммунал хизмат кўрсатиш бошқармаси бошлиғи сифатида ишлаб келаётганди.
Эслатиб ўтамиз, Хонобод шаҳрининг собиқ ҳокими Мусахон Мамадалиев 29 сентябрь куни пневмония асоратлари ва ўткир юрак қон-томир етишмовчилиги касаллигидан вафот этганди.
«Дарё» мухбирининг аниқлик киритишича, Хонобод шаҳрининг собиқ ҳокими сўнгги маротаба 2020 йил 9 сентябрь куни вилоят прокурори ўринбосари Бахтиёр Худойбердиев иштирокидаги ёшлар ҳамда «темир дафтар»га киритилган аҳоли бандлигини таъминлаш ва уларга ижтимоий ёрдам кўрсатиш мақсадида ўтказилган учрашувда кўриниш берган.
Шаҳар ҳокими саломатлигини тиклаш мақсадида уч кундан ортиқ муддат давомида ўз уйида даволанган. 2020 йил 14 сентябрдан бошлаб эса, у Республика ихтисослаштирилган кардиология илмий-амалий тиббиёт маркази Андижон филиалида пневмония касаллигидан даволанишни бошлаган. Тиббиёт ходимларининг қайд этишича, унда коронавирус аломатлари бўлмаган.
Изоҳ (0)