Куни кеча истеъфога чиққан Қирғизистон президенти Сўронбай Жээнбеков халқ олдида ҳам, Худо олдида ҳам виждони тоза эканлигини айтди. «РБК»нинг хабар беришича, бу ҳақда у Қирғизистон парламентининг навбатдан ташқари йиғилишида айтган.
«Мамлакат учун қийин бўлган пайтда вазиятни тиклаш учун ҳамма нарсани қилишга ҳаракат қилдим. Мен учун ҳар бир ватандошнинг ҳаёти ва соғлиғи азиздир. Мен кетишга қарор қилдим. Жамият бу қарорни турлича қабул қилди, тўғрими ёки йўқми, буни вақт ва тарих кўрсатади. Худо ва халқ олдида виждоним тоза», — деган Жээнбеков.
Шунингдек, у йиғилганлар олдида мамлакатни қонуний йўлга қайтариш ва вазиятни барқарорлаштириш учун барча саъй-ҳаракатларини ишга солганини таъкидлади.
Йиғилиш чоғида парламент Жээнбековга президентлик фаолияти учун миннатдорчилик билдирди. Қонунчилик органи спикери Канат Исаев, хусусан, унинг мамлакат тараққиётига улкан ҳисса қўшганлигини билдирди. «Ватан олдидаги хизматингиз ғоят каттадир. Сизнинг мардонаворлигингиз туфайли барқарорлик сақланиб қолишга эришилди. Сўронбай Жээнбеков собиқ президентнинг барча имтиёзларини сақлаб қолиши керак», — деб таъкидлаган у.
Қирғизистон президентлиги лавозимидан истеъфога чиқишини маълум қилгач, Канат Исаев автоматик равишда Қирғизистон президенти вазифасини бажарувчи лавозимини эгаллаган, бироқ ярим кун ўтиб истеъфога чиққанди. Давлат раҳбари вазифасини вақтинчалик бажариш амалдаги бош вазир Садир Жапаров зиммасига ўтди.
Садир Жапаров йиғилишда ҳокимиятни топшириш тинч йўл билан ўтганлигини таъкидлади. «Бахтимизга, ҳеч қандай таловчилик ёки хусусий мулкни тортиб олиш бўлмади. Инқилоб ҳам бўлмаган. Ҳукумат тинч, қонуний йўл билан алмашди», — деган у.
Жээнбеков ўзининг истеъфога чиқиш баёнотида Қирғизистон тарихида ўз халқига ўқ отган ва қон тўккан президент сифатида қолишни истамаслигини, мамлакат бутунлиги ва жамиятдаги тотувлик унинг учун ҳамма нарсадан устун эканлигини айтганди.
Қирғизистонда 2005—2007 йилларда бош вазир сифатида ҳукуматни бошқарган собиқ сиёсатчи Феликс Кулов мамлакат президенти Сўронбай Жээнбековнинг истеъфо бергани юзасидан ўз фикр-мулоҳазаларини билдириб, номаълум кучлар зўравонлик йўли билан ҳукуматни эгаллашга уриниб, президентга ўз хоҳиши билан истеъфо бериш ёки ўзаро уруш бошлашни таклиф этганини, акс ҳолда бундай инқирозли даврда у ўз хоҳиши билан бундай юқори лавозимни тарк этиш борасида қарор қабул қилмаслигини таъкидлаган.
«Энди парламентни тарқатиб юбориш ҳақида гап-сўзлар урчиган. Кейин ҳукумат бош вазирнинг бошқарувига ўтади. Ундан кейин нималар бўлиши мумкинлигини ва ҳаммаси қандай сценарий остида кетиши энди ойдинлашмоқда», – деб ёзган Кулов Facebook’даги саҳифасида.
Изоҳ (0)