Тошкентда 1100 дан ортиқ фуқарони 6,2 млрд сўмга чув туширган хусусий бандлик агентлигининг кирдикорлари фош қилинди

Recruit Consulting Work МЧЖ хусусий бандлик агентлиги мансабдор шахслари 2019 йилнинг январь ойидан ноябрь ойига қадар фуқароларни Корея, Япония, Латвия, Литва, Чехия, Нидерландия, Германия, Швеция, Словакия каби давлатларда иш топиб бериш ва ишга жойлаштиришни ваъда қилиб, жуда кўп миқдордаги пулларини фирибгарлик йўли билан эгаллаган. Мазкур ҳолат юзасидан 2019 йил 23 декабрь куни Чилонзор туман прокуратураси томонидан Ж.А. ва бошқаларга нисбатан Жиноят кодексининг 168-моддаси 4-қисми «а» банди билан жиноят иши қўзғатилганди.

«Kun.uz» нашри Ички ишлар вазирлиги ҳузуридаги Тергов департаменти маълумотларига таянган ҳолда жиноят иши бўйича қўшимча ахборотларни эълон қилди.

Қайд этилишича, тергов ҳаракатлари департамент иш юритувига қабул қилиниб, вилоятларда истиқомат қилувчи 1100 дан ортиқ жабрланувчиларни сўроқ қилиш ва улар билан боғлиқ тергов ҳаракатларини ўтказиш мақсадида тегишли Тергов бошқармаларига алоҳида топшириқлар юборилган.

Жиноят иши бўйича тўрт нафар шахс Жиноят кодексининг 168-моддаси (фирибгарлик) 4-қисми «а,в» бандлари, 211-моддаси (пора бериш) 3-қисми «б» банди, 167-моддаси (ўзлаштириш ёки растрата йўли билан талон-торож қилиш) 3-қисми «а,в» бандлари ва 184-моддаси (солиқлар ёки бошқа мажбурий тўловларни тўлашдан бўйин товлаш) 3-қисми билан айбланувчи тариқасида иштирок этишга жалб қилиниб, уларга нисбатан қамоққа олиш тарзидаги эҳтиёт чораси қўлланилган.

Олиб борилган дастлабки тергов ҳаракатлари давомида мазкур хусусий бандлик агентлиги томонидан 1087 нафар фуқароларга жами 6,2 миллиард сўм миқдорида зарар етказилган. Етказилган зарарнинг 272 миллион сўми нақд пул кўринишида қопланган, 48,7 миллион сўмлик товар-моддий бойликлари ҳамда 505,6 миллион сўмлик пул маблағлари хатланган.

Жамият ходимлари фуқаролардан алдов йўли билан шартномадан ташқари нақд пул кўринишида 650 миллион сўмдан ортиқ маблағларини олишган. Бундан ташқари, жамият мансабдор шахслари фуқароларни Ташқи меҳнат миграцияси агентлигида чет тиллари бўйича имтиҳонлардан ўтказиш ва Японияга юборишни ваъда қилиб, алдов йўли билан 212 минг АҚШ доллари миқдорида нақд пул олган. Бу пулларнинг 120 минг 500 доллари фуқароларга қайтарилган.

«Дастлабки тергов ҳаракатлари 2020 йил июль ойида тамомланиб, жиноят иши мазмунан кўриб чиқиш учун жиноят ишлари бўйича Тошкент шаҳар судига юборилган. Жиноят ишининг судда кўриб чиқилиши натижалари бўйича қўшимча маълумот берилади», – дейилади хабарда.