Ўтган тунда Қирғизистонда ҳукуматни ноқонуний эгаллашга уриниш юз берди. Бу ҳақда мамлакат президенти Сўронбай Жээнбеков маълум қилди, деб ёзади «РБК».
«Ўтган тунда баъзи сиёсий кучлар давлат ҳукуматини ноқонуний эгаллаб олишга уринди. Сайловлар якунларини важ қилиб, жамоат тартибини бузишди. Улар шаҳарликларнинг тинч ҳаётига халақит берди. Ҳуқуқ-тартибот органларига итоат қилишмади, тиббиёт ходимларини дўппослашди ва биноларга зиён етказишди», — дея президент баёнотини келтириб ўтди «AКИpress» нашри.
Жээнбеков куч вакилларига бирорта ҳам фуқаронинг ҳаётини хавф остига қўймаслик учун ўт очмасликни буюрганини айтди.
Давлат раҳбарининг сўзларига кўра, у Марказий сайлов қўмитасига қоидабузарликлар билан боғлиқ материалларни диққат билан ўрганиб чиқишни, керак бўлса, парламент сайловлари натижаларини бекор қилишни тавсия этган. Барча сиёсий кучларни у қонун майдонига қайтишга чорлади. «Давлатдаги хотиржамлик, жамият барқарорлиги ҳар қандай депутатлик мандатидан устунроқ… Мен сиёсий партиялар етакчиларини ўз тарафдорларини тинчлантириб, уларни оломон тўпланган жойлардан олиб чиқиб кетишга, ҳамюртларимни тинчлик сақлашга ва провокацион кучлар даъватларига берилмасликка чақираман», — деди Жээнбеков.
Бу орада ҳукумат биносида парламентга ўтмаган мухолифат партиялар етакчилари вақтинчалик Вазирлар маҳкамасини шакллантиришни муҳокама қилмоқда. «Ата-Журт» мухолифат партияси етакчиси Қамчибек Ташиев бино яқинида тўпланган одамларга бош вазир лавозимига парламент собиқ депутати Садир Жапаров кўзда тутилаётганини маълум қилган, у ўтган тунда намойишчилар босими остида ҳибсдан озод этилганди. У Қоракўлда 2013 йилда митинглар уюштиргани ҳамда Иссиқкўл вилояти губернатори Эмилбек Каптагаевни гаровга олгани учун 2018 йилда 11,5 йиллик қамоқ жазосига ҳукм қилинган эди. Муваққат ҳукумат таркиби бўйича якуний қарорни мухолифат кечга яқин қабул қилишни режалаштирмоқда.
Маълумот учун, мамлакатнинг бир неча минг аҳолиси Қирғизистонда бир кун аввал бўлиб ўтган парламент сайловлари натижаларидан норози бўлгани учун митингга чиққан. Расмий маълумотларга кўра, 16 та иштирокчи партиядан 4 тасигина Жўқорғи Кенгешга ўтган, улардан 2 таси — ҳукуматга қарашли. Сайловларда кўп сонли қоидабузарликлар, шу жумладан, овозларни сотиб олиш қайд этилган. Мағлуб бўлган партиялар вакиллари овоз бериш якунларини тан олишдан бош тортди ва Марказий сайлов қўмитасини уларни бекор қилишга чақирди.
Изоҳ (0)