Осиё футбол конфедерацияси (ОФК) «Персеполис» ҳужумчиси Иса Алкасирни олти ой муддатга футболга оид ҳар қандай фаолиятдан четлатди.
Гап шундаки, футболчининг Осиё Чемпионлар Лигаси чорак финал баҳси доирасида «Пахтакор»га қарши кечган баҳсда (2:0) голни нишонлаш вақтидаги ҳаракати ирқий камситиш дея баҳоланган. Иса гол нишонлаш вақтида қўллари ёрдамида атайин кўзини қисиқ қилиб кўрсатганди.
ОФК баёнотида келтирилишича Алкасир бу орқали тартиб интизом кодексининг 58.1 бандини бузган. Ташкилот олти ойлик дисквалификациядан ташқари футболчига 10 минг АҚШ доллари миқдорида жарима ҳам белгилаган.
Қизиғи шундаки, ўйин 30 сентябрь куни ўтказилган бўлса-да ОФКнинг мазкур қарорни «Персеполис»нинг «Ан-Насср»га қарши кечадиган ярим финал ўйинига уч соат вақт қолганида эълон қилди.
Эслатиб ўтамиз, айнан шу футболчи «Пахтакор»га қарши ўйин олдидан бўлиб ўтган «Ас-Садд»га қарши баҳсда қизил карточка олганди. Бироқ ОФК унинг четлатилишини бекор қилган ва тошкентликларга қарши ўйинда иштирок этишига рухсат берганди. Футболчи «шерлар» дарвозасига урилган икки голга ҳам ўзи муаллиф бўлганди.
Эрон матбуотида айтилишича, голнинг бу тариқа нишонланиши Иса Алкасир учун одатий ҳолга айланган. У мазкур ҳаракат орқали голларини марҳум жиянига бағишлаши айтилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)