Организм оддий шамоллаш ёки COVID-19 билан кураш олиб бораётганда, энг аввало, кучга муҳтож бўлади. Айнан шундай пайтда тўғри ва соғлом овқатланиш жуда муҳимдир. Сабаби истеъмол қилинаётган ҳар бир маҳсулот «кураш»да катта роль ўйнайди. Агар касаллик аломати сезила бошланса, қуйидаги 6 маҳсулотни рациондан чиқариш тавсия этилади.
Апельсин шарбати
Агар касаллик йўтал ёки шамоллаш билан кечадиган бўлса, апельсин, мандарин ёки улардан тайёрланадиган шарбатни ичишни тўхтатган маъқул. Сабаби ушбу мевалар таркибида лимон кислотаси кўп бўлиб, у яллиғланган томоқнинг шиллиқ қаватига зарар етказиши ва тикланишига тўсқинлик қилиши мумкин.
Ширинликлар
Айниқса, касалланган пайтда организм ширинлик талаб қилади, гўёки ундан касалликка қарши курашда энергия оладигандек туюлади. Аслида эса бундай эмас, таркибида шакар бўлган бирор ширинлик истеъмол қилинса, иммунитет сусаяди ва касаллик қайталаниши ҳолати кузатилади. Ундан кўра, ширинликлар ўрнига шакарсиз қора шоколад истеъмол қилиш тавсия этилади, бунинг учун тана эгасидан, албатта, миннатдор бўлади.
Кофеинли газланган ичимликлар
Ширин таъмга эга газланган ичимликларни рациондан умуман чиқариб ташлаган маъқул. Улар, аввало, юрак-қон томир тизимига зарар етказади. Модда алмашинувини бузади ва ҳатто саратон хавфини ҳам оширади. Айниқса, касал бўлганда организм учун икки маротаба зарар, кофеин танани сувсизлантиради, шакар эса иммунитетни туширади.
Спиртли ичимликлар
Ҳар қандай касалликка чалинган ёки, умуман, соғлом инсонга ҳам спиртли ичимликнинг турган-битгани заҳар. Биринчидан, танани сувсизлантиради. Иккинчидан, ошқозон-ичак йўли билан боғлиқ ҳар қандай муаммоларни кучайтириши мумкин. Агар ич қотиши ёки диарея кузатилаётган бўлса, спиртли ичимликлар қабул қилишни бас қилиш керак.
Фаст-фуд
Бонн университетининг тадқиқотчилари шуни маълум қилдики, фаст-фуд таомлар организмни кучсизлантириб, унга турли хил касалликлар юкланишига сабаб бўлар экан. Шунинг учун ҳам бу каби тезпишар егуликлардан нафақат касалланган вақтда, балки соғлом пайтдаёқ воз кечиш керак.
Аччиқ таомлар
Агар шамоллаш бурун ва томоқ соҳаларида сезила бошланса, бунинг учун аччиқ таомлар истеъмолини дарҳол тўхтатиш керак. Ҳар қандай аччиқ таомлар бурун ва томоқ шиллиқ қаватига зарар етказади.
Изоҳ (0)