Ҳар бир қиз эртаклардаги маликаларга ҳавас қилади. Аммо эртак бошқа, ҳаёт бошқа. Малика бўлиш қуйидаги аёлларнинг бахтли бўлишига сабаб бўла олмаган.
Малика Диана ва шаҳзода Чарльз
1981 йилда малика Диана ва шаҳзода Чарльзнинг турмуш қурганидан кейин тўй ҳақида ёзмаган ОАВ қолмаган. Аммо аср тўйи деб аталган маросимдан кейин Диана учун қийин кунлар бошланган. У эрининг ҳаётида бошқа аёл — Камилла Паркер-Боулз борлиги ҳақида яхши билган. Малика Эндрю Мортонга берган интервьюсида муаммолар тўй маросимидан кейин бошлангани, булимиядан азият чекиб, ўзини ёмон кўргани ва ҳаммасига рақиби Камиллани айбдор деб билганини таъкидлаган. Турмуш ўртоғидан эътибор кўрмаган Диана атрофдан эътибор излай бошлаган. У от спорти мураббийси Жеймс Хьюитт билан танишади. Бу вақтда Чарльз Камилла билан муносабатларини яширмай қўйган ва ҳатто биргаликда саёҳатга ҳам жўнаб кетганди. ОАВ эса икки қироллик вакилининг маъшуқалари билан телефон орқали сўзлашмаси эълон қилинган материаллар билан тўлиб-тошади. Уларнинг ҳар иккиси эса турмуши дарз кетишида бир-бирини айблаган. Бундан қиролича Елизавета ғазабланган ва уларнинг ажрашишини талаб қилган.
Малика Ҳайя ва шайх Муҳаммад ибн Рашид ал-Мактум
Малика Ҳайя фарзандлари ва 39 миллион долларни олиб, Буюк Британияга қочиб кетган. Малика бу ишни ҳаётини сақлаб қолиш учун амалга оширганини баҳона қилса, расмий версияда шайх рафиқасининг қўриқчиси билан хиёнат қилганини билиб қолгани айтилади. Аёли қўриқчисига авваллари ҳам қимматбаҳо совғалар туҳфа қилгани ва кўп вақтини бирга ўтказгани ал-Мактумда шубҳа уйғотган. Айни вақтда жуфтлик фарзандлар ким билан қолишини суд орқали ҳал қилиш билан банд.
Малика Маргарет ва Энтони Армстронг-Жонс
Елизавета II нинг синглиси малика Маргарет бутун умри давомида бир инсонни — отбоқар Питерни яхши кўрган. Расмий маросимлардан бирида у Питер билан яқин муносабатда экани репортёрлар эътиборидан четда қолмаган. Питер монарх хонимдан 16 ёш катта, турмуши ўхшамаган ва келиб чиқиши қироллик оиласига муносиб бўлмаган эркак эди. 1960 йилда Маргарет Энтони Армстронг-Жонсга турмушга чиқади, аммо кўнгли бўлмагани учун ўзини турмушидан мамнундек кўрсатишга ҳаракат ҳам қилмайди. Энтони билан 18 йиллик турмуши давомида Маргаретнинг юрагида фақат бир эркак — бир вақтлар телбаларча ошиқ бўлган Питер бўлган.
Малика Луиза ва Фридрих Липпе-Шаумбургский
Малика Луиза ва Фридрих Липпе-Шаумбургский 1984 йилда унаштирилган, аммо турмуши Луизани бахтли бўлишига сабабчи бўлмаган. Уч нафар фарзандни дунёга келтирган малика ҳамиша ўзини ёлғиз ҳис қилган. У 1906 йилда менингит билан касалланган ва шу йилнинг ўзида вафот этган.
Малика Токхе ва Такеюки Со
Кореялик малика Токхе 13 ёшида гаров сифатида Японияга юборилган, оиласи ва юртидан узоқда яшаган. У граф Такеюкига турмушга чиқишга мажбур бўлган. Уларнинг ҳар иккиси ҳам бахтсиз бўлган. Лекин малика фарзанди тарбияси билан ўзини чалғитган бир вақтда эри оиласидан ҳафсаласи пир эканлигини яширмаган. Депрессияга тушган Токхега шизофрения ташхиси қўйилган. Эри рафиқасини жиннихонага ётқизиб, ўзи ажрашиш жараёни билан шуғулланишни бошлаб юборган. Узоқ йил давомида жиннихонада даволанган малика 1962 йилда юртига қайтган ва ҳаётининг қолган қисмини оила аъзолари даврасида ўтказган.
Мавзуга доир:
Изоҳ (0)