Мурат Йилдирим суратга тушаётган «Рамо» сериали устидан шикоят, Неслиҳан Атагул «темир қиз» образида: Турк киносида нима гаплар? (фото)

Турк киноижодкорлари томонидан турли мавзуда суратга олинаётган фильм ва сериаллар ҳақида янгиликларни эътиборингизга ҳавола этамиз.

Неслиҳан Атагул кам учрайдиган саратон касаллиги туфайли вафот этган Неслижан Тай ҳаёти ҳақидаги фильмда суратга тушади. «Темир қиз Неслижан» фильмининг суратга олиш ишлари марҳуманинг туғилган куни – 2021 йил 14 март-кунидан бошланади.

Неслижаннинг «Енгилсам ҳам, курашиб енгиламан» деган шиори бор эди. 2019 йил сентябрь ойида тўртинчи бор касаллик қайталанишидан сўнг Неслижан 21 ёшида бу оламни тарк этди. Аммо у даҳшатли касалликка қарши курашнинг рамзи сифатида ёдда қолди.

Айни дамда «Рамо» сериалида суратга тушаётган Мурат Йилдирим 11 ёшли боланинг Twitter тармоғида РТУКга ёзган шикоятини ўқиб ҳайратга тушди. Шикоят қуйидагича бўлган: «Салом. Мен 5-синф ўқувчисиман, ёшим 11 да. Телевидение орқали намойиш этилаётган ‘Рамў сериалида қонли пичоқлашиш саҳнасини кўриб, жуда ҳам таъсирландим. Илтимос, ушбу сериални тўхтатинг».

Сериалда бош ролни ўйнаётган актёр Мурат Йилдирим шикоятга жавобан: «Мен тушуна олмаяпман, агар кимдир англаган бўлса, менга ҳам изоҳ берсин. Мен қайси бирига кўпроқ ҳаяжонланишни билмай турибман: 11 ёшли боланинг ижтимоий тармоқдаги фаоллигигами, РТУКнинг сериал ҳақидаги биринчи шикоятигами ёки 11 ёш боланинг турк тили грамматикасини яхши билишигами?». Табиийки, сериал ижодкорларига жарима солинади.

Боран Кузум «Агентимга қўнғироқ қилинг» сериалининг махсус таклиф этилган юлдузи бўлди ва сериалнинг 6-қисмида томошабинлар билан учрашади.

Дунё бўйлаб сон-саноқсиз мухлисларга эга Фаҳрие Эвжен томошабинлар қалбини забт этишда давом этмоқда. Қозоғистонда актриса иштирокида L’Oreal Paris Elseve реклама ролиги намойиш этила бошланди.

Маълумотларга кўра, «Туғилган уй тақдирингдир» ва «Қизил хона» сериаллари бир-бири билан чамбарчас боғлиқ деган хабар пайдо бўлди. Бунинг ажабланарли жойи йўқ, чунки икки лойиҳа ҳам таниқли ёзувчи ва руҳшунос Гулсерен Будайижиўғлининг асарлари асосида суратга олинган. Шунингдек, сериалнинг биринчи қисмида Зейнеп (Демет Ўздемир) «кўринмас» руҳшунос билан суҳбатлашади.

«Жаноб хато» картинаси учун актёрлар таркибини тўлдиришга тайёргарлик кўрилмоқда. Бирсен Алинташнинг сўзларига кўра, Селин сериалда қаҳрамон Дерин сифатида намоён бўлади.