Шота Арвеладзеда коронавирус аниқланди. «Пахтакор» бугун «Шаҳр Ходро»га қарши ўйнайди

Тошкентнинг «Пахтакор» клуби бош мураббийи Шота Арвеладзеда коронавирус аниқланди, деб ёзмоқда «Championat.asia».

Қайд этилишича, топширилган тест натижалари Шота Арвеладзенинг коронавирусга чалинганини кўрсатган. Буни клуб расмийлари ҳам тасдиқлаган. Энди Арвеладзе 7 ёки 14 кун давомида ўзини ўзи яккалаш ҳолатида бўлиши керак.

Қайд этиш жоиз, «Пахтакор» 23 сентябрь, чоршанба куни Осиё Чемпионлар Лигаси гуруҳ босқичи 6-тури доирасида Эроннинг «Шаҳр Ходро» жамоасига қарши майдонга тушади. Гуруҳ босқичининг ҳал қилувчи ўйинини «шерлар» бош мураббийсиз ўтказишга мажбур. Мазкур баҳсдаги ғалаба Тошкент клубини мусобақа нимчорак финалига олиб чиқади.

Айни дамда «Пахтакор» Б гуруҳида 8 очко билан 2-ўринда бормоқда. Биринчи поғонани эса 11 очкога эга «Ал-Ҳилол» эгаллаб турибди. «Ал-Аҳли» эса 7 очкога эга. «Шаҳр Ходро» бўлса, атиги 1 очко тўплаган.