Пенсия жамғармасининг 34 ёшли ходими «жиддий касалликка қарши оғир курашдан сўнг» вафот этди
Ўзбекистон Молия вазирлиги ҳузуридаги Бюджетдан ташқари пенсия жамғармаси Маблағларни бошқариш ва пенсия, нафақалар тўлови мониторинги бўлими бошлиғи Миродил Қосимов вафот этди, деб хабар бермоқда жамғарма матбуот хизмати.
Қайд этилишича, Қосимов жиддий касалликка қарши оғир курашдан сўнг, 2020 йил 19 сентябрь куни вафот этган. У айнан қайси касаллик асоратлари оқибатида вафот этганига аниқлик киритилмаган.
Миродил Қосимов 10 йилдан ортиқ вақт мобайнида, жумладан, 2010—2015 йиллар давомида Пенсия жамғармасининг Тошкент вилоят бошқармасида Маблағларни бошқариш ва тўлов мониторинги бўлимида мутахассис, кейинчалик бўлим бошлиғи лавозимида ишлаган.
2015—2020 йилларда Пенсия жамғармасининг ижро этувчи аппаратининг Маблағларни бошқариш ва пенсия, нафақалар тўлови мониторинги бўлим бошлиғи лавозимида фаолият юритган.
Маълумот учун, сўнгги вақтларда турли давлат органлари матбуот хизматлари томонидан ходимларнинг вафоти ҳақидаги таъзияномалар кўплаб эълон қилинмоқда. Уларнинг баъзиларида ходимнинг ўлимига коронавирус инфекцияси асоратлари сабаб бўлгани кўрсатиб ўтилмоқда.
Соғлиқни сақлаш вазирлиги томонидан юритилаётган коронавирус статистикасига кўра, Ўзбекистонда ҳозиргача 429 киши COVID-19 оқибатида вафот этган. Бироқ «Дарё» юритаётган алоҳида ҳисоб бўйича, Ўзбекистонда коронавирус қурбонлари сони расмий статистикадагидан камида 18 тага кўп.
Хусусан, Соғлиқни сақлаш вазирлиги статистикасидаги қуйидаги ўлим ҳолатлари ҳисобга олинмаган:
- 9 ва 15 июль кунлари Олмалиқ шаҳар шифохоналарида вафот этган икки аёл;
- ДХА Навоий вилояти бошқармаси ходими Адҳамжон Деҳқонов;
- Маданият вазирлиги ходими Акмал Ирисов;
- Чилонзор тумани СЭОМ бактериология лабораторияси мудири Марҳабо Аҳмедова;
- Бош прокурорнинг собиқ ўринбосари, Қорақалпоғистон прокуратурасида бўлим бошлиғи Ҳакимбай Халимов;
- Жиноят ишлари бўйича Тошкент вилоят суди судьяси Хайриддин Шермуҳамедов;
- Самарқанд вилояти Тойлоқ тумани прокурори Фарҳод Абдухолиқов;
- Инновацион соғлиқни сақлаш миллий палатаси «Буюк келажак» кенгаши эксперти Санжар Жалолов;
- Бердақ номидаги Қорақалпоқ давлат академик мусиқали театри артисти Жанабай Утепбергенов;
- Ўзбекистонда хизмат кўрсатган санъат арбоби, «Ўзбеккино» миллий агентлиги Бадиий кенгаши аъзоси Анвар Эргашев;
- «Ўзметкомбинат» акциядорлик жамияти бошқаруви раиси Сергей Вюненко;
- Қашқадарё вилоятининг Миришкор тумани ҳокими Ғайрат Бегалиев;
- Шифокор Фаррух Рустамов;
- Хоразм вилояти Қўшкўпир тумани Фавқулодда вазиятлар бўлими бошлиғи майор Дониёр Жабборов;
- ИИВ подполковниги Абдураҳмон Пардиев;
- Жиноят ишлари бўйича Андижон вилоят судининг судьяси Шавкатжон Шодмонов;
- «Миллий тикланиш» демократик партияси вакили, Халқ депутатлари Яшнобод туман Кенгаши депутати Дилдора Умарова.
