Сирдарё вилояти Гулистон туманида мол бозордан чора молларини сотиб олиш учун айланиб юрган фуқаронинг пулларини ўғирлаб қочган киссавур орадан олти ой ўтгач қўлга олинди, деб хабар беради Тергов департаменти.
Маълумотларга кўра, 12 март куни «Кўнчи» мол бозорида 55 ёшли А.У.га тегишли сариқ рангли матодан тикилган сумканинг остки қисмини кесилиб, унинг ичида бўлган жами 15 миллион сўм пуллар киссавурлик йўли билан ўғирлаб кетилган.
Мазкур ҳолат юзасидан Гулистон шаҳар ИИБ ҳузуридаги Тергов гуруҳи томонидан номаълум шахсга нисбатан Жиноят кодексининг 169-моддаси 2-қисми «а» банди (ўғирлик, яъни жабрланувчининг кийими, сумкаси ёки бошқа қўл юкидаги ашёга нисбатан (киссавурлик) ) билан жиноят иши қўзғатилган эди.
Дастлабки тергов жараёнида мазкур жиноятни муқаддам содир этган жинояти учун Самарқанд вилояти Оқдарё тумани ИИБ ҳузуридаги Тергов бўлими томонидан қўзғатилган жиноят иши бўйича Жиноят кодексининг 169-моддаси 3-қисми «а» банди билан айбланувчи тариқасида ишда иштирок этишга жалб қилиниб, «қамоққа олиш» тарзидаги эҳтиёт чораси қўлланилган 41 ёшли Л.Х. содир этганлиги аниқланган.
Гулистон тумани ИИБ ҳузуридаги Тергов гуруҳи иш юритувидаги жиноят иши бўйича Л.Х. гумон қилинувчи тариқасида жалб қилинган.
Ҳозирда мазкур жиноят иши юзасидан тергов ҳаракатлари олиб борилмоқда.
Изоҳ (0)