Ice Universe ники остидаги таниқли инсайдер AnTuTu бенчмаркида iPhone 12 Pro Мах устида ўтказилган дастлабки тест натижаларига эътибор қаратди. Қайд этилишича, янги смартфон ўзидан олдинги iPhone 11 Pro Мах’дан анча кучли бўлиб чиққан.
Янги iPhone 12 Pro Мах тест натижаларида 572 минг балл тўплаган. Таққослаш учун, ундан олдинги моделда ушбу кўрсаткич 524 мингга тенг эди — фарқ 10 фоиз. Турли операцион тизимларни ўзаро таққослаш у қадар тўғри бўлмаса-да, ушбу кўрсаткичдан ҳатто Snapdragon 865 Plus ҳам пастроқ.
Инсайдернинг ёзишича, Apple iPhone 12 линейкасидаги янги процессорларда уларнинг ишчанлигини оширишга эмас, балки чипнинг энергия самарадорлиги ва иссиқ ажратишига эътибор қаратган. Янги iPhone’ларга Apple А14 процессори ўрнатилади — бу 5 нанометрли илк мобил чип ҳисобланади.
Эслатиб ўтамиз, сентябрь ойидаги тақдимотда янги iPhone’лар тақдим этилмаган бўлиб, уларнинг тақдимоти октябрь ойига мўлжалланган. Шу билан бирга, ҳозирга қадар iPhone 12 линейкасининг нархи ва бошқа деталлари ҳақида аниқ маълумотлар йўқ.
Аввалроқ Apple расман 2020 йилги янги iPhone’лар савдоси ҳар доимгидан кечроқ бошланишини маълум қилганди.
Изоҳ (0)