Москвада Mazda базасида яратилган «Запорожец» сотувга қўйилди (фото)

Москвада ўзига хос тарзда таъмирдан чиққан «ЗAЗ-968А» модели сотувга қўйилди. Бу каби лойиҳалар АҚШ ва Европада рестомода дейилади. Автомобиль асосини — Япониянинг Mazda 323F хетчбекига тегишли агрегат ва узатмалар ташкил этади, деб хабар беради CARakoom.

Ўзгаришлар фақат двигателда эмас. Машина ихлосмандлари кузовнинг ноодатий пропорциясига ҳам тезда эътибор қаратади. У бироз пасайтирилгандек. Аслида эса у пасайтирилмаган, балки кенгайган. Кузов иккига бўлиниб, бир неча сантиметр қўшилган ва қайта пайвандланган. Олд ва орқа ойналарни эса, албатта, қайтадан тайёрлашга тўғри келган.

Бу каби ноодатий ечим машинага Mazda’нинг 16 клапанли, 1,7 литрли моторини ўрнатишга имкон яратган. Узатмалар ҳам олдинга кўчган. Орқа қисмида эса юкхона жойлашган — худди бошқа «нормал» автомобиллардаги каби.

1977 йилда ишлаб чиқарилган мазкур автомобиль 550 минг рублга (7300 доллар) баҳоланмоқда. Машина ҳозирга қадар 10 минг километр йўл босган.

Аввалроқ Краснодарда «Запорожец» асосида яратилган «Formula-1» болиди сотувга қўйилгани, Украинада эса «Запорожец» Zazerati «суперкари»га айлантирилгани тўғрисида хабар берилганди.