Ўзбекистон бош вазири ўринбосари Беҳзод Мусаев июль ойи охирида «Ўзбекистон 24» телеканалига берган интервьюсида Зангиота туманидаги янги қурилган кўп тармоқли юқумли касалликлар шифохонаси (Зангиота КТ ЮКШ)да ишлаётган тиббиёт ходимларининг бирортаси коронавирусга чалинмаганини айтган эди. Интервью (катта эҳтимол билан 28 июль куни ёзиб олинган) 29 июль куни эфирга берилган эди.
Журналистнинг саволларига жавоб бераркан, бош вазир ўринбосари Беҳзод Мусаев, жумладан, шундай деганди:
Ҳозирда 14 кун давомида вахта тартибида ишлаётган «дўхтир»ларнинг бир сменаси ўтди, ҳозир иккинчи 14 кунлик иш кетяпти — бу ердаги ҳаво алмаштириш тизими тўғри йўлга қўйилгани учун бирорта «дўхтир» (коронавирус билан) зарарлангани йўқ, бирорта ҳамшира COVID-19 касаллиги билан зарарлангани йўқ.Бироқ реаниматолог Фаррух Рустамовнинг вафоти муносабати билан Чирчиқ шаҳридаги Тошкент вилояти юқумли касалликлар шифохонаси бош шифокори Гулжаҳон Йўлдошевага нисбатан қўзғатилган жиноят иши тафсилотлари бош вазир ўринбосари Беҳзод Мусаевнинг июль ойи охирида «Ўзбекистон 24» телеканалига берган интервьюсидаги сўзлари ҳақиқатга тўғри келмаслигини кўрсатмоқда.
Коронавирусга чалинган Фаррух Рустамов тегишли тиббий ёрдам кўрсатилмагани оқибатида 2 август куни вафот этган. Чирчиқ шаҳар прокурори Бахтиёр Иброҳимовнинг маълум қилишича, Фаррух Рустамов Зангиотадаги кўп тармоқли юқумли касалликлар шифохонасида кўнгилли сифатида ишлаётганида касалликни юқтириб олган. «Дарё» манбасининг маълум қилишича, Рустамовда коронавирус 23 июль куни тасдиқланган.
Шифокор Фаррух Рустамовнинг коронавирус асоратлари оқибатида вафот этгани прокуратура органлари эълон қилган Тошкент вилояти Юқумли касалликлар шифохонаси бош шифокори Гулжаҳон Йўлдошевага нисбатан қўзғатилган жиноят иши тафсилотларидан маълум бўлди. Рустамов вафотидан сўнг Президент Шавкат Мирзиёев томонидан «Жасорат» медали билан мукофотланган. Унинг коронавирус асоратлари оқибатида вафот этгани Ўзбекистон Соғлиқни сақлаш вазирлиги томонидан 15 сентябрь ҳолатига кўра расман тасдиқланмаган.
Маълумот учун, Зангиотадаги коронавирусга чалинган беморларни жойлаштириш учун мўлжаллаб қурилган кўп тармоқли юқумли касалликлар шифохонаси 6 июлдан бошлаб аҳолига хизмат кўрсатишни бошлаган. Июль ойи бошида берилган хабарларда умумий қиймати 504 миллиард сўмлик мажмуа 2000 ўринга мўлжаллангани маълум қилинган эди. Расмийлар унинг қувватини 3500 ўрингача кўпайтириш режалаштирилаётганини маълум қилган эди.
Изоҳ (0)