Қашқадарё вилоятида 855 нафар мактаб ходимида коронавирус аниқланди. Бу ҳақда «Дарё» мухбири билан суҳбатлашган вилоят халқ таълими бошқармаси бошлиғи Абдуғани Ҳимматов маълум қилди.

Абдуғани Ҳимматовга кўра, вилоятдаги 1151 та мактаб ҳамда 191 та филиалда фаолият юритувчи 75 427 нафар ходимнинг 32 261 нафари коронавирусга тест топширган бўлиб, шундан 855 нафар ходимда коронавирус аниқланган.

«Шу боисдан ҳам бугун вилоятдаги 109 та мактабда анъанавий дарслар бошланишига рухсат бердик. Айнан шу 109 та мактаб ходимларида коронавирус аниқланмаган», — деди Абдуғани Ҳимматов.

Мазкур хабарни тасдиқлаган вилоят Санитария ва эпидемиология осойишталик маркази бош врачи Собир Муродов коронавирус билан касалланган ўқитувчиларнинг 41 нафар бугун аниқланганини қўшимча қилди.

Таъкидланишича, Қашқадарё вилоятининг Касби, Деҳқонобод ва Китоб туманларидаги мактабларда анъанавий дарс машғулотлари ўтказилишига рухсат берилмаган.

Эслатиб ўтамиз, аввалроқ Бухоро вилоят халқ таълими бошқармаси бошлиғи Дилфуза Мустафоева вилоятда 239 нафар ўқитувчи коронавирусга чалинганини маълум қилганди. Вилоят ҳокими ўринбосари Мирали Ҳамроев эса бу хабарни рад этди.