Ўзбекистонда 14 сентябрдан жами мактабларнинг чорак қисми — 2635 та мактабда дарслар анъанавий шаклда бошланди

Ўзбекистонда 14 сентябрдан бошлаб яна 2300 дан ортиқ мактаб очилиб, уларда анъанавий таълим бошланади. Шундай қилиб, мамлакатда фаолияти йўлга қўйилган мактаблар сони 2635 тани ташкил этади. Бу ҳақда Халқ таълими вазирлиги хабар берди.

Аксарият мактабларда анъанавий таълим октябрь ойига қадар тикланиши кутилмоқда. Бунда мактабларни очиш ҳақидаги қарор индивидуал тарзда жойлардаги ҳақиқий ҳолат ҳамда соғлиқни сақлаш тизими хулосаларига мувофиқ, маҳаллий кенгашлар депутатлари рухсатидан сўнг қабул қилинади.

«Бундай қарор ҳудуддаги эпидемиологик вазият, ўқитувчиларда аниқланган коронавирус кўрсаткичи, ҳудуддаги соғлиқни сақлаш тизимининг вазиятга тайёрлигидан келиб чиқиб қабул қилинади.

Бунда ҳар бир ҳудуд индивидуал тарзда ёндашаётганлигини ҳам алоҳида қайд этиш мумкин. Айтайлик, Навоий вилоятидаги баъзи мактабларда дастлабки ҳафталарда, асосан, бошланғич синф ўқувчилари анъанавий таълим шаклига жалб қилинмоқда, бошқа вилоятларда эса мактабнинг ҳар бир синфи турли вақтда ва навбатда ўқишни ташкил қилмоқда.

Ҳар бир вилоят ва туман кесимида фаолияти тикланаётган мактаблар тўғрисидаги маълумотлар тегишлилиги бўйича ҳокимликлар ва туман халқ таълими бўлимлари расмий интернет тармоқларида эълон қилиниши белгиланган. Шу билан биргаликда, мактаблар синф раҳбарлари орқали ота-оналарни хабардор қиладилар», – дейилади вазирлик хабарида.

Маълумот учун, Ўзбекистондаги умумтаълим мактаблари сони 10 мингга яқин. Ўқувчилар 6,2 миллион нафар, ўқитувчилар эса 486 мингдан ошади.

Аввалроқ Ўзбекистонда пандемия шароитида ўқитувчи ва ўқувчиларнинг соғлиғини ҳимоя қилиш мақсадида мактаб ўқитувчиларидан оммавий равишда COVID-19’га тест олинаётгани хабар қилинганди. Шунингдек, Самарқанд вилоятининг Жомбой туманида 40 нафар ўқитувчида, Пайариқ туманида эса 60 нафар ўқитувчида коронавирус аниқлангани маълум бўлганди.