Чироқчи туман ИИБ биносида вафот этган 32 ёшли Юсуф Абдураҳмонов учун чақирилган тез тиббий ёрдам дастлаб бошқа шахс исм-фамилияси айтилиб, чақирилган. Бу ҳақда судда гувоҳлик берган тез тиббий ёрдам шифокори Равшан Ҳусанов маълум қилди, дея хабар берди «Дарё» мухбири.
«ИИБ биносига бориб, учинчи қаватга чиққанимизда бемор деворга суянган ҳолда чап томонга қараб ётган экан. Бирдан аммиак ҳидлатдик сезмади, қон босимини кўрдик—йўқ. Кўз қорачиқлари кенгайиб кетган. Тана яхлай бошлаган эди. Клиник белгилари йўқ экан», — деди Равшан Ҳусанов.
Гувоҳ Равшан Ҳусанов судда прокурор саволига жавоб берар экан, «Бемор юзида салгина кўкариш ва тана яхлаганини кўрдим, бошқа ҳеч нарсани кўрмадим», — деди.
Равшан Ҳусанов билан чақирувга борган тиббиёт ходими, гувоҳ Ҳамид Санақулов эса, бемор юзида кўкаришлар бўлмаганини, марҳумнинг танасида жароҳат кўрмаганини, аммо ўлим доғлари бўлганлигини айтди.
Таъкидланишича, тез тиббий ёрдам шифокорлари ИИБ биносида ярим соат қолган. Бемор ўлиб қолганлигини билгач бу ҳақда маълумот олиш учун ИИБ масъулларини топа олмаган ва ортга қайтган.
Эслатиб ўтамиз, 32 ёшли фуқаро Юсуф Абдураҳмонов ИИБ ходимлари томонидан уриб ўлдирилгани жамоатчиликка маълум бўлгач мазкур жараённи ўрганган «Дарё» мухбири ўша куни воқеа жойида бўлган Баҳром Авлиёқулов ҳамда Қурбон Остоноевлар билан суҳбатлашганди. Улар кечаси, тахминан, 01:30 да қўйиб юборилгач, ИИБ биносида ҳеч ким йўқлигини, уларни қоровул бинодан чиқариб юборганлигини айтганди.
«Чироқчи воқеаси» айбдорларини ўрганаётган суд 2020 йил 16 сентябрь соат 14:00 гача танаффус эълон қилди.
Мавзуга доир:
- «Чироқчи воқеаси» бўйича судда гувоҳликка чақирилган ИИБ ходими ота-бола қийноққа солинган куни «противогаз» сўраб олинганини тан олди
- «Сени ҳам, уни ҳам ўлдирамиз ва ишни бир парча қоғоз билан ёпиб юборамиз». Чироқчи ИИБда қийноққа солинган фуқаро ИИБ ходими таҳдиди ҳақида гапирди
- «Жасадни ювамиз десак, ғичирлайди. Шунчалик калтакланганки, синмаган суяги қолмаган экан» — ИИБ биносида вафот этган чироқчилик марҳумнинг яқинлари
Изоҳ (0)