«Анора» фильми билан танилган Фотима Воҳидова «хунуклиги туфайли кинода омади чопмагани» ҳамда Туркияда оила қургани ҳақида сўзлаб берди (видео)

Актриса Фотима Воҳидова 2007 йилда суратга олинган «Анора» фильмидаги образи билан томошабинлар эътиборига тушган. У 2009 йилда экран юзини кўрган «Бир келиб кетинг қишлоғимизга» фильмида ҳам эсда қоларли образ яратган эди.

Журналист Жасур Ҳамроев Фотима билан Истанбулда учрашиб, суҳбат қурди. Актриса ўзбек кино оламида омади чопмагани сабаби, турк йигитга турмушга чиқиб, ҳозир Истанбул шаҳрида яшаётгани ҳақида сўзлаб берди.

Фотима Воҳидова 2017 йилда туркиялик Ниёзи Шаҳин исмли йигит билан турмуш қурган. Улар ҳозирда Сумайя Симай исмли қиз фарзандни тарбияламоқда.

«2017 йилда Туркияга бир ойга айланишга келдим. Шу ерда яшайдиган дугонам нуқул менга ‘Сени Туркияга узатаман’ дерди ҳазиллашиб. Шундай қилиб, ўша дугонам турмуш ўртоғининг дўсти билан мени таништирди. Танишдик, гаплашдик, гапимиз бир-биримизга тўғри келди. Ёшим ҳам ўтиб бораётганди. Шу тариқа турмуш қурдик», — дейди Фотима Воҳидова.

«Ростини айтсам, авваллари ўзбек қизларининг Туркияга турмушга чиққанини эшитсам, қабул қила олмасдим, қизғанардимми, билмайман. Ўзимнинг ҳам тақдиримга турк йигитига турмушга чиқиш ёзилган экан. Лекин ҳеч ҳам афсусланмайман, шундай инсонга турмушга чиққанимдан бахтлиман, жуда яхши оилага келин бўлганман. Оллоҳга беҳисоб шукур», — дея сўзларини давом эттиради актриса.

«Нима деб ўйласиз, кинода нега омадингиз чопмади?», деган саволга актриса «хунуклигим учун» деб жавоб беради.

«‘Анора’ фильми бош ролига кастингдан ўтганимдан кейин журналистлар режиссёр Мурод Ражабовдан ‘Нега бунча хунук қиз бу, чиройлироқ қиз йўқмиди?’ деб сўрарди. Кейин кўпчилик киносиновларга борсам, хунуклигимни юзимга очиқчасига айтишарди. Миллий театрда 3, Муқимий театрида 7 йил ишладим. Кўп фильмларга эпизод ролларга ҳам суратга тушишга рози бўлардим. Лекин мени энг хафа қилган нарса — ўқиган биздек актёрлар пойгакда, соҳанинг устаси эмаслар тўрда бўлиб қолди. Нафақат менга, балки бошқа ижодкор дўстларимга бўлган муносабат мени хафа қилди ва санъатни тарк этишга қарор қилдим», — дейди Фотима Воҳидова.

Актриса турк фильмларида суратга тушиш истаги борлиги ҳақида ҳам гапирди.

«Санъатдан кетган бўлсам ҳам у менга бегона эмас. Турмуш ўртоғим уйда касбимни соғинаётганимни кўриб, актрисалик қилишимга рухсат берди. Турк фильмлари кастингида иштирок этдим. Чақиришяпти, бироқ ҳомиладор бўлиб, фарзандимни дунёга келтирганим учун ҳозир бора олмаяпман», — дейди актриса.