Фото: Колумбиянинг «Муҳаббат қаҳваси« сериали бош қаҳрамонлари 26 йилдан сўнг

Лотин Америкасида суратга олинган энг муваффақиятли сериаллардан бири «Муҳаббат қаҳваси» эфирга узатилганига 26 йил тўлди. Сериал сабаб машҳурликнинг чўққисига чиққан актёрлар билан бирга ўша даврларни ёдга оламиз.

Сериал сюжети

Бепоён қаҳва даласи. Бир гуруҳ ишчилар у ерда қаҳва доначаларини териш билан банд. Улар орасида ёқимли овозга эга жингалак соч Гавёта ҳам қўшиқ куйлаб қаҳва термоқда. Оддий қаҳва эмас, муҳаббат қаҳваларини.

Бадавлат фермер Октавионинг дафн маросимига ташриф буюрганлар ичида унинг набираси Себастьян ҳам бор. У қаҳвачи қизга ошиқ бўлган. Лондонга ўқиш учун кетган Себастьян ва уни излаб ортидан бегона юртларга борган Гавётанинг олдидан чиқадиган бир қанча тўсиқлар мавжуд эди. Жуфтлик бир-бирига нисбатан ҳар қанча нафрат ва аламзадалик кайфиятида бўлмасин, «Муҳаббат қаҳваси» уларни яна бир жойда учраштираверарди.

«Муҳаббат қаҳваси» сериали сценарийси марҳум ёзувчи Фернандо Гайтанга тегишли бўлиб, 1994 йилда экран юзини кўрди ва қаҳва терувчи Гавёта исмли қиз ва машҳур қаҳвачилар оиласининг вакили Себастьяннинг муҳаббати миллионлаб томошабинлар эътиборини тортди.

Венесуэланинг Багота шаҳрида жойлашган қаҳва далалари ва шаҳар манзаралари орасида кечган муҳаббат ҳикояси қаҳва маданиятини бутун дунёга машҳур қилган энг биринчи сериал намунасига айланди. Фильми муваффақиятга эришган Гайтан 58-ёшида миокард туфайли вафот этди.

Бош қаҳрамон Гавёта (Маргарита Роса де Франциско) 28 ёш, Себастьян эса (Гай Эккер) 25 ёшда эди. Фильм машҳурлик билан бирга бир неча номинацияларда ҳам ғолиб бўлди.

Маргарита Роса де Франциско

Маргарита Роса де Франциско 1965 йил 8 августдаКолумбиянинг Кали шаҳрида туғилган. У мусиқачи ва актёр Херардо де Франциско ҳамда моделер Мерседес Бакоронинг қизи эди. Унинг опаси Мартина де Франциско ҳам телебошловчи бўлган.

Маргарита болалигида Кали шаҳридаги Антонио Мария консерваторияси балет йўналиши бўйича таълим олади ва бироздан сўнг умуртқа поғонасидаги касаллик туфайли бу соҳани тарк этишга мажбур бўлади. Кейинчалик инглиз тилини ўрганиш мақсадида Нью-Йоркка кетади ва 1984 йил «Йил гўзали» эътирофига сазовор бўлади.

1984 йил Колумбиядаги «Миллий гўзаллик» танловида вице-тожга эга бўлади. Афсуски, 1985 йилда ўтказилган «Дунё гўзали» танловида аввалгидек муваффақиятга эришолмайди.

1986 йилда режиссёр Хулио Цезарнинг «Галлито Рамирес» теленовелласида Карлос Вивес билан учрашади ва орадан икки йил ўтиб, улар турмуш қуради.

Шу тарзда бир қанча муваффақиятли роллар ижросидан сўнг у 2003 йили 46 ёшида ўзидан кичик, 38 ёшли Даниел Кастеллога турмушга чиққан.

Гай Федерик Эккер

Сериалда Себастьян ролини ижро этган актёр Гай Федерик Эккер 1959 йил Бразилиянинг Сан-Паулу шаҳрида дунёга келган. У ота-онаси АҚШдан Бразилияга таътилга келган пайтда дунёга келди. Оилада учинчи бўлиб туғилган фарзанднинг акалари ва сингиллари ҳам бор.

Актёр уч тилда – португал, испан ва инглиз тилларида бемалол сўзлаша олади. У АҚШ ва Лотин Америкасида суратга олинган кўплаб фильмларда роль ижро этган. У ижоди давомида ҳаммаси бўлиб 19 дан ортиқ кино ва теленовеллада суратга тушган.

https://www.instagram.com/p/CAPNKaMJ1Ya/

Актёр ҳам партнёри каби икки маротаба оила қурди. Биринчи турмуш ўртоғи америкалик актриса, хонанда, телебошловчи ва продюсер Ниа Пиплз эди. Яна шундай ҳол такрорланди ва улар ажрашди.

Иккинчи турмуш ўртоғи Эстела Сайнс билан у мустаҳкам оила қурди. Улар икки фарзанд кўрди.