Шимолий Кореянинг Pyongyang Broadcast Service давлат радиостанциясининг YouTube каналида ноодатий хабар рақамли кодлар тўплами билан юкланиб, кейин ўчириб ташланган ёки яширилган. Бу ҳақда «РИА Новости» хабар қилди.
Joseon-Ilbo газетасининг ёзишича, «0100011001-001» деб номланган тахминан бир ярим дақиқа давом этган видео хостингга 29 август куни эрталаб юкланган.
Жанубий кореялик журналистлар буни КХДРнинг чет элдаги махсус агентларига аталган шифрланган хабари сифатида талқин қилган. Унда «719 экспедиция агентлари учун масофавий таълим университети ахборот технологиялари тўғрисида асосий маълумотларни такрорлаш вазифаси» мавжуд эди. Видеодаги мухбир аёл «564-бет 23-рақам, 479-бет 19-рақам, 694-бет 20-рақам» каби ибораларни ўқиган.
Жанубий Корея оммавий ахборот воситаларининг ёзишича, бу КХДР ўзининг жосусларига хабар тарқатиш учун биринчи марта YouTube каналидан фойдаланиши. Уларнинг таъкидлашича радио Совуқ Урушдан бери бундай эшиттиришларни мунтазам равишда намойиш этиб келади. Бу йил охирги марта бундай эшиттиришлар 7 ва 13 март кунлари бўлиб ўтган.
Ҳозирда «0100011001-001» видеоси канал саҳифасида мавжуд эмас. Маълум қилинишича, видеони камида 2,5 минг киши томоша қилишга муваффақ бўлган.
Изоҳ (0)