Ўзбекистонда расмий статистик маълумотлар бўйича шу кунгача коронавирусга чалинганларнинг 3 932 нафари болалар бўлиб, улар орасида ўлим ҳолатлари қайд этилмаган. Бу ҳақда Соғлиқни сақлаш вазирлиги ҳузуридаги Коронавирусга қарши курашиш бўйича штаб аъзоси Барно Абдусаматова 28 август куни маълум қилди.
Маълум қилишларича, шу кунгача 89 755 нафар бола карантинга олинган, уларнинг 3 932 нафарида коронавирус аниқланган. Қайд этишларича, Ўзбекистонда коронавирусга чалинган болаларнинг
- 190 нафари (4,8 фоизи) 1 ёшгача,
- 683 нафари (17,4 фоизи) 3 ёшгача,
- 934 нафари (23,8 фоизи) 3 ёшдан 7 ёшгача,
- 2125 нафари (54 фоизи) 7 ёшдан 18 ёшгача
«Болалар орасида касалликнинг ўта оғир кечиши ва ўлим ҳолати бўлмади», — дея қўшимча қилди ССВ ҳузуридаги штаб аъзоси Барно Абдусаматова. Қайд этиш жоиз, аввалроқ ССВ ҳузуридаги штабнинг бошқа аъзолари — Нурмат Отабеков ва Ҳабибулла Оқилов Ўзбекистонда коронавирус инфекцияси асоратлари оқибатида вафот этганлар орасида 14 ёшли бола борлигини маълум қилган эди.
Нурматов ва Оқиловнинг сўзларини ССВ томонидан эълон қилиб борилаётган кунлик статистик маълумотлар асосида текшириш имкони йўқ, чунки вазирлик барча ўлим ҳолатлари ҳақида аниқ бир стандарт асосида ахборот бермаган (хусусан, айрим ўлим ҳолатлари ҳақидаги ахборотларда қурбонларнинг ёши ва жинси кўрсатилмаган).
Изоҳ (0)