Тошкент вилоятидаги 12 млрд сўмлик таъмирлаш ишларини олиб бериш учун тадбиркордан 60 минг доллар талаб қилган шахс ушланди

Тошкент вилоятида амалга ошириладиган капитал таъмирлаш ишларини олиб бериш учун тадбиркордан 60 минг доллар талаб қилган шахс қўлга олинди. Бу ҳақда «Дарё»га Бош прокуратура томонидан хабар берилди.

Маълум қилинишича. фуқаро Н.Б. «А» МЧЖ раҳбари М.га Тошкент вилояти Нурафшон шаҳрида қурилиши лозим бўлган умумий қиймати 7,5 миллиард сўмлик мактаб биноси ва Олмалиқ туманидаги 4,5 миллиард сўмлик капитал таъмирлаш ишларини юқори лавозимларда ишловчи танишлари орқали олиб беришга ишонтирган. Н.Б. ушбу хизмати эвазига 60 минг доллар талаб қилган.

Бош прокуратура ҳузуридаги Иқтисодий жиноятларга қарши кураш департаментининг Тошкент шаҳар бошқармаси томонидан ўтказилган тезкор тадбирда Н.Б. олдиндан 4 минг доллар олган вақтида ашёвий далил билан ушланган.

Мазкур ҳолат юзасидан Н.Б.га нисбатан Жиноят кодексининг 168-моддаси 4-қисми «а» банди (жуда кўп миқдорда фирибгарлик) ва 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.