Беларусда нима гап? 26 августнинг асосий воқеалари

Беларусда 9 август куни ўтказилган президент сайлови натижасидан кейин келиб чиққан намойишлар ҳамон давом этмоқда. Қуйида 26 августнинг асосий воқеаларини санаб ўтамиз.

25 август куни бўлиб ўтган намойишлардан сўнг бугун эрта тонгдан Беларусь кўчалари бирмунча сокин бўлди. Аммо, шунга қарамай, Минскнинг бир қатор туманларида бирдамлик занжирлари ҳосил қилинди. Уларда Фанлар академияси аъзоларини қўллаб-қувватлаш кўзда тутилган эди.

Шунингдек, Россиянинг Санкт-Петербург шаҳрида ҳам Беларусь халқига бирдамлик акцияси ўтказилди.

БелАЗ заводи ишчилари ҳам бугун ўзига хос юришни амалга оширди.

25 август куни бўлиб ўтган Мустақиллик куни намойишлари чоғида 51 киши ҳибсга олингани хабар қилинди. ИИВ маълумотига кўра, намойишларда 4 800 га яқин киши қатнашди.

Шунингдек, кеча Гродно шаҳридаги «Гродно Азот» заводи ишчиларининг ҳам бир гуруҳи ҳибсга олиниб, протокол тузилганидан кейин қўйиб юборилган эди. Бунга жавобан завод ишчилари Беларуснинг мухолифатчилар томонидан тақдим қилинаётган оқ-қизил-оқ рангли байроғи заводнинг аммиак цехларининг биридаги регенераторнинг чўққисига ишчилар томонидан илиб қўйилди.

Беларусь расмийлари эса барча давлат ва нодавлат ташкилотларига ёзма равишда мурожаат қилиб, ташкилот биносига Беларуснинг амалдаги байроғини илиб қўйишни ва барча фаолларга Лукашенко фойдасига митинглар ташкил қилишни буюрди.

Беларусь фахри, адабиёт бўйича Нобель мукофоти лауреати Светлана Алексиевич тергов қўмитасига сўроққа чақирилди.

Уни ҳокимиятни эгаллашга даъват этганлик иши бўйича гувоҳликка чақиришган экан. Унинг сўзларига кўра, сўроқ 40 дақиқа давом этган ва у ўзига қарши кўрсатма беришдан бош тортган.

Тергов қўмитаси идораси олдига уни ҳимоя қилиш мақсадида одамлар йиғилиб турган.

27 август куни мазкур иш юзасидан Мария Колесникова сўроқ қилинади. Шу пайтгача иш юзасидан кенгашнинг уч аъзоси терговга чақирилган эди.

Беларусда намойишлар давом этмоқда.