Президент Шавкат Мирзиёев шу йилнинг 5—6 июнь кунлари Фарғона вилоятига ташрифи давомида Фарғона ва Марғилон шаҳарлари ҳудудини кенгайтириш бўйича топшириқ берган эди. ЎзАнинг ёзишича, айни кунларда урбанизация жараёнларини жадаллаштириш мақсадида ишлар бошлаб юборилган.
Вилоят қурилиш бошқармаси томонидан тақдим этилган бош режага асосан Марғилон шаҳрини кенгайтириш мақсадида Фарғона тумани Чекшўра Машраб Бобур массиви ҳудудидан бир қисми ҳамда Марғилон йўлдош шаҳарчаси майдонларини бириктириш муносабати билан Марғилон шаҳар маъмурий ҳудудий чегара чизиғига ўзгартириш киритиш белгиланган. Ишчи гуруҳ томонидан бу бўйича таклиф тайёрланган.
Унга асосан Фарғона тумани Чекшўра Машраб Бобур массивидан 10 та қишлоқ хўжалик корхоналари, 8 та бегона ердан фойдаланувчилар, Марғилон йўлдош шаҳарчасидан 12 та бегона ердан фойдаланувчилар жами — 734,91 гектар, шундан экин ер майдони — 151,82 гектар, кўп йиллик дарахтлар — 118,07 гектар ва 465,02 гектар бошқа ер майдонларини Марғилон шаҳрига ажратиш учун лойиҳа ишлари амалга оширилган.
Фарғона туманидан 734,91 гектар ер майдони шаҳарга қўшилгандан кейин Марғилон шаҳрининг умумий майдони 4817,91 гектарни ташкил қилади. Ҳозирда бу борада тегишли меъёрий-ҳуқуқий ҳужжатлар лойиҳалари тайёрланиб, маҳаллий кенгашлар ва Олий Мажлисда кўриб чиқиш учун киритишишлари олиб борилмоқда.
Эслатиб ўтамиз, Президент Шавкат Мирзиёев 5 август куни Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишганди. Президент матбуот хизмати аҳолига қулайлик яратиш мақсадида Тошкент шаҳридан Тошкент вилоятига 1010 гектар, вилоятдан пойтахтга 10196 гектар ер майдони ўтказилиши режалаштирилаётгани ҳақида хабар берганди.
Қурилиш вазири Ботир Зокиров пойтахтнинг Сергели, Чилонзор ва Учтепа туманларидан бир қисми, шунингдек, Мирзо Улуғбек тумани таркибидаги Улуғбек шаҳарчасини Тошкент вилояти ҳудудига ўтказиш таклиф этилаётганини маълум қилган.
Тошкент шаҳрининг ҳудудлари ўзгариши мўлжалланаётган маҳаллалари аҳолиси ушбу таклифга қарши чиққан. Хусусан, Учтепа тумани ва Улуғбек шаҳарчаси аҳолиси уларнинг яшаш ҳудудлари Тошкент вилояти таркибига ўтказилишига норозилик билдирган. Учтепа ва Сергели туманларида аҳоли кўчага йиғилиб, мутасаддилардан изоҳ талаб қилган.
Изоҳ (0)