SpaceX космик компанияси асосчиси ва Tesla бош директори Илон Маск дунёнинг энг бадавлат инсонлари рейтингида тўртинчи поғонага кўтарилиб олди, деб хабар беради Bloomberg.
Маск Франциянинг LVMH (Louis Vuitton Moët Hennessy) компанияси бош директори Бернар Арнони (84,6 миллиард доллар) ортда қолдирган. Агентлик Маскнинг бойлигини 84,8 миллиард долларга баҳоламоқда. Бу рейтингнинг учинчи поғонасидан ўрин олган Facebook асосчиси Марк Цукербергникидан 15 миллиард долларга камроқ дегани.
Рейтингга Amazon корпорацияси раҳбари Жефф Безос 188 миллиард доллар билан етакчилик қилмоқда. Иккинчи ўрин эса Microsoft асосчиси Билл Гейтсга насиб этган (121 миллиард доллар).
Нашрнинг ёзишича, 49 ёшли Маскнинг бойлиги 17 август куни Tesla акциялари қийматининг ортиши фонида 7,8 миллиард долларга кўпайган. 2020 йил давомида Маск 57,2 миллиард долларга бойиган бўлиб, бу дунёдаги энг яхши иккинчи натижа ҳисобланади. 2020 йилда ундан кўпроқ фақат Жефф Безос ишлаб топган — 73 миллиард доллар.
17 август куни Tesla акциялари нархи тарихий максимумга етган. Уларнинг нархи АҚШ саводларида 11 фоизга қимматлашиб, 1800 долларлик маррани забт этган. Бунга Хитойда компания электромобилларига бўлган талабнинг ортиши сабаб қилиб кўрсатилмоқда.
Эслатиб ўтамиз, июль ойида Илон Маск Forbes версияси бўйича дунёнинг энг бой беш кишиси қаторига кирган эди.
Изоҳ (0)