Кўчадаги Беларусь. Намойишларнинг 6-куни дайжести

Хабарингиз бор, 9 август куни Беларусь республикасида навбатдаги президент сайлови бўлиб ўтди. Сайловда амалдаги президент Александр Лукашенко олтинчи марта номзодини қўйди ва бу сафар ҳам кўпчилик овоз билан ғолибликни қўлга киритди.

Мамлакатда мана олти кундирки намойишлар тўхтамаяпти. Намойишларнинг олтинчи кунида Беларусдаги аҳвол қандай? Бугунга келиб нималар ўзгарди? 14 август дайжестида шу саволларга жавоб қидирамиз.

Бугун Беларусь МСК сайлов бўйича якуний натижаларни эълон қилди. МСК эълон қилган натижаларга кўра, амалдаги президент Александр Лукашенко 80,1 фоиз овоз тўплаб, олтинчи марта мамлакат президенти этиб сайланди. Унинг асосий рақиби Светлана Тихановская эса 10,12 фоиз овоз тўплаб, иккинчи ўринни эгаллади. Қолган номзодлар – Анна Канопацкая, Андрей Дмитриев, Сергей Череченлар нисбатан кам овоз тўплади.

* * *

Беларусда давом этаётган намойишлар вақтида жами 6 700 киши полиция томонидан ҳибсга олинди. Уларнинг аксарияти 13 август соат 22:30 да озодликка чиққан бўлса, қолган қисми бугун, 14 август тонгида озодликка чиқиши хабар қилинган эди.

Ҳозирча ҳибсдагилардан қанчаси озодликка чиққани маълум эмас. Мамлакат ИИВ ўринбосари кеча намойишчилар билан учрашган ва учрашув чоғида намойишчиларга нисбатан ҳеч қандай куч ишлатиш ҳолатлари бўлмаганини айтди. Аммо ижтимоий тармоқларда тарқалаган хабарларда ва суратларда намойишчиларнинг полиция томонидан калтаклангани ҳолатлари тасвирга тушурилган суратлар ва видеолар тарқалиб кетди.

* * *

14 август куни, шунингдек, Беларуснинг бир қатор шаҳарларидаги йирик ишлаб чиқариш корхоналари ишчилари сайлов натижаларини қайта кўриб чиқишни талаб қилиб намойишчиларга қўшилди. Улар бутун мамлакат бўйлаб иш ташлашлар ўтказиш билан таҳдид қилди.

Шунингдек, намойишчилар полиция томонидан куч ишлатилишини тўхтатишни талаб қилди.

Норозилик акциясида қатнашганлар орасида Минск автомобиль заводи (МАЗ), Минск трактор заводи (МТЗ), Минск мотор заводи (ММЗ), Минск метрополитени, «Гродно Азот», «Беларуськалий» сингари бир қатор йирик завод ва корхоналар ҳам бор.

* * *

Эски-янги президент Александр Лукашенко бугун қурилиш соҳаси муаммоларига бағишланган йиғилиш ўтказди. Йиғилиш бошланишидан олдин у ўзи ҳақида турли миш-мишларга жавоб берди.

Аввало, шуни айтмоқчиманки, мен соппа-соғман ва бизнинг баъзи «ақллиларимиз» «президент мамлакатни тарк этди ва хорижда» каби миш-миш тарқатганларидек хорижда эмасман.

Александр Лукашенко

Лукашенко унинг рақиблари ишлаб чиқариш соҳаси ходимларини чалғитишга уринаётгани ҳақида гапирди ва ишчиларни иш ташлашларда қатнашмаслик ҳақида огоҳлантирди. Агар ишлаб чиқариш тўхтаса, бу Беларусь билан рақобат қилаётган давлатларга қўл келиши мумкинлигини айтди.

«Агар сиз бугун 10та трактор ишлаб чиқармасангиз, уни бозорга олиб чиқмасангиз, немислар ва америкаликлар ўз техникаларини Россияга олиб келади», деди Лукашенко.

* * *

Мухолифатдаги номзод Светлана Тихановская бугун ўзининг навбатдаги видеомурожаатини йўллади.

Литвада яшаётган Тихановская барчани, жумладан, шаҳарлар мерларини ҳам тинч намойишларда қатнашишга даъват этди.

Дарвоқе, собиқ маданият вазири, дипломат Павел Латушко намойишчиларни қўллаб-қувватлаб чиқди.

Тихановскаянинг мурожаати Европа Иттифоқи Беларусга қарши санкциялар бўйича йиғилиш ўтказган вақтга тўғри келди.

«Беларусда демократик қадриятларни бузган ёки инсон ҳуқуқларини поймол қилганларга қарши қўшимча санкциялар жорий қилишимиз зарур», дея изоҳ қолдирди Еврокомиссия раҳбари Урсула фон дер Ляйен ўзининг Twitter’даги саҳифасида.

https://twitter.com/vonderleyen/status/1294198913377824768

Ҳукумат уйи олдидаги намойишчилар мамлакат бош вазири Роман Головченконинг чиқишини талаб қилмоқда.

Айни пайтда намойишлар тинч йўл билан ўтаётганига қарамай, Мустақиллик майдони томон ҳарбий техника йўл олди.

Ҳукумат уйини ҳарбийлар қуршаб олди. Улар намойишчиларни яқинлашмасликка чақирмоқда, айни пайтда намойишлар тинчи ўтган тақдирда ҳеч кимга тегинмасликни ваъда бермоқда.