Молия вазирлиги Инқирозга қарши курашиш жамғармасининг даромад ва харажатлари ҳақида маълумот берди. Унга кўра, 11 август кунига қадар жамғарма ҳисобига жами 10 триллион сўм келиб тушган. Улардан 9,87 триллион сўми халқаро молия институтларининг имтиёзли кредитлари, 123,5 миллиард сўм эса давлат бюджети ҳисобидан. Жамғармадан 7,8 триллион сўм сарфланган.
Ижтимоий соҳа
Инқирозга қарши курашиш жамғармасидан энг кўп маблағ мамлакат ижтимоий соҳасига — жами 2,56 триллион сўм (+0,4 триллион сўм) йўналтирилган. Бунда, маблағлар қуйидагича тақсимланган:
- 512 миллиард сўм шаҳарлар ва кўча йўлларини таъмирлаш ишларига;
- 489 миллиард сўм ижтимоий нафақаларга;
- 372 миллиард сўм умумтаълим ва ихтисослаштирилган мактабларни қуриш, реконструкциялаш, жиҳозлаш ишларига;
- 200 миллиард сўм банд бўлмаган фуқароларни вақтинчалик ишларга жалб қилиш учун Жамоат ишлари жамғармасига;
- 181 миллиард сўм Тошкент шаҳар маҳаллий бюджетига ссуда сифатида;
- 138 миллиард сўм мактабгача таълим муассасаларини қуриш, реконструкция қилиш, капитал таъмирлаш ва жиҳозлаш ишларига
- 117 миллиард сўм бюджетдан ташқари Пенсия жамғармасига субсидия;
- 100 миллиард сўм Президент мактабларини қуриш ва жиҳозлаш ишларига;
- 100 миллиард сўм кам таъминланган оилаларда яшовчи хотин-қизларни қўллаб-қувватлаш учун Касаба уюшмалари федерациясига;
- 78 миллиард сўм маҳаллий бюджетларга солиқ имтиёзлари берилиши натижасида даромадлар етишмовчилигини қоплаш учун;
- 62 миллиард сўм «Агробанк» АТБга аҳоли бандлигини таъминлаш учун кредит линиялари;
- 57 миллиард сўм жисмоний тарбия ва спорт объектларини қуриш ва жиҳозлаш ишларига;
- 54 миллиард сўм «Ўзтемир йўловчи» АЖнинг фуқароларни манзилларига етказиб қўйиш харажатлари;
- 50 миллиард сўм ишсиз, кам таъминланган оилаларга шахсий томорқаларини ривожлантиришга;
- 30 миллиард сўм «Тошкент метрополитени» ва «Тошшаҳартрансхизмат» ходимларига иш ҳақи тўлаш учун;
- 25 миллиард сўм карантиндаги фуқароларни доимий яшаш манзилларига олиб бориб қўйиш ҳамда хорижий давлатлардан қайтиб келган фуқароларни карантин ҳудудларига ташиш харажатлари;
- 9 миллиард сўм «Ўзавтотранссервис» ва «Тошшаҳартрансхизмат» транспорт харажатларини қоплашга.
Мамлакат иқтисодиётини қўллаб-қувватлаш учун жами 2 трлн сўм (+164 миллиард сўм) сарфланган. Ушбу маблағнинг 500 миллиард сўми «Иссиқлик электр станциялари» АЖ корхоналарига, 401 миллиард сўм эса «Ўзбекнефтгаз» АЖга субсидия сифатида, 250 миллиард сўм «Ҳудудий электр тармоқлари» АЖга ва 150 миллиард сўм «Навоийазот» АЖга ссуда сифатида берилган.
Инқирозга қарши курашиш жамғармасидан 300 миллиард сўм маблағ туман бюджетларига ер майдонларидан фойдаланиш учун ва 14 миллиард сўм кичик саноат зоналари учун ажратилган.
Шу билан бирга, авиация соҳасига жами 507 миллиард сўм сарфланган (406 миллиард сўм Uzbekistan Airways ва 101 миллиард Uzbekistan Airports’га ссуда сифатида берилган). Туризм соҳасини қўллаб-қувватлаш жамғармасига 20 миллиард сўм ажратилган.
Қолган 40 миллиард сўм эса «Биринчи резинотехника заводи» МЧЖнинг харажатларини қоплаш учун сафарбар этилган.
Санитария-эпидемиологик осойишталик агентлиги
Инқирозга қарши курашиш жамғармасидан Санитария-эпидемиологик осойишталик агентлиги ҳисобига 1,8 триллион сўм (+0,9 триллион сўм) ўтказилган. Ушбу суммадан 530 миллиард сўм тест тизимлари, реактивлар ва ҳимоя воситаларини сотиб олиш учун сарфланган.
358 миллиард сўм фуқароларни карантинда сақлаш билан боғлиқ харажатларга ва 110 миллиард сўм уларнинг овқатлантиришга; 28 миллиард сўм жамоат жойларини дезинфекция қилиш ишларига, 10 миллиард сўм эпидемиологик ҳолат билан курашиш бўйича тадбирларга сарфланган.
Бундан ташқари, карантин тадбирлари ва коронавирусга қарши курашда иштирок этаётган тиббиёт ходимлари ва бошқа ходимларга қўшимча рағбатлантириш учун тўловларга 597 миллиард сўм сарфланган. 11 миллиард сўм махсус автотранспорт воситаларини харид қилиш учун яратилган.
Шифохоналарни қуриш ва жиҳозлаш
Жами 816 миллиард сўм (+132 миллиард сўм) шифохоналар ва карантин мажмуаларини қуриш ва жиҳозлаш учун сарфланган. Ушбу маблағнинг 365 миллиард сўми 10 минг ўринли махсус шифохоналар қуриш учун, 251 миллиард сўм 20 минг ўринли аҳолини вақтинчалик карантинда сақлаш мажмуасини қуриш учун, 39 миллиард сўм Қорақалпоғистон Республикаси, Самарқанд ҳамда Сурхондарё вилоятларида ташкил этиладиган махсус шифохоналар ва вақтинчалик карантинда сақлаш мажмуаларига, шунингдек, 10 миллиард сўм диагностика лабораторияси мажмуаси реконструкциясига сарфланган.
Шунингдек, 29 миллиард сўм «Ҳудудий электр тармоқлари» АЖга, 27 миллиард сўм Тошкент вилояти Зангиота туманила 2160 ўринли тиббиёт ходимлари учун ётоқхона мажмуаси қурилишига, 15 миллиард сўм Наманган шаҳрида 120 ўринли туғриқ мажмуаси қурилишига ва 8 миллиард сўм Тошкент вилояти Янгийўл туманида тиббиёт бирлашмаси қурилиши ва реконструкция ишларига Инқирозга қарши курашиш жамғармасидан сафарбар этилган.
Сув таъминоти ва ирригация тадбирлари
Харажатлар қаторида 692 миллиард сўм (+90 миллиард сўм) сув таъминоти ва ирригация тадбирларига йўналтирилган. Бунда ажратилган маблағлар қуйидагича тақсимланган:
- 336 миллиард сўм ирригация объектларини қуриш ва реконструкцияси учун;
- 153 миллиард сўм Уй-жой коммунал хизмат кўрсатиш вазирлигига ичимлик суви таъминоти ва оқава сув чиқариш тизимларини қуришга;
- 89 миллиард сўм «Ҳудудий сув таъминоти» МЧЖга ссуда тариқасида ажратилган маблағлар;
- 53 миллиард сўм Давлат экология қўмитасига ссуда сифатида.
Изоҳ (0)