Зинедин Зидан Гарет Бэйлнинг нима сабабдан «Манчестер Сити»га қарши ўйнамаслигини маълум қилди

«Реал» бош мураббийи Зинедин Зидан нима сабабдан ҳужумчи Гарет Бэйлни «Манчестер Сити»га қарши ўйин қайдномасига киритмаганини маълум қилди.

Аввалроқ Гарет Бэйл «Реал»нинг «Манчестер Сити»га қарши ўйин учун эълон қилган кенгайтирилган таркибидан ўрин олмаганди.

— Бэйлнинг қайдномага киритилмаганига нима сабаб бўлди?

— Ҳозиргача кўплаб гаплар айтилди. Ўртамизда мураббий ва ўйинчи сифатида ўзаро ҳурмат бор. Шахсий суҳбат бўлди, бироқ мен сизга шуни айтишим мумкин, у ўйнамасликни маъқул кўрди, қолгани — ўртамиздаги гаплар.

— Бэйлнинг йўқлиги шахсий сабаблар туфайлими?

— Ҳа, аммо бу ҳақда бошқа ҳеч нарса дейишни хоҳламайман, чунки бу иккимиз ўртамиздаги шахсий масала.

— Бэйлдан кўнглингиз қолдими?

— Йўқ, ундан кўнглим қолмаган ва сизга бошқа ҳеч нарса демайман. Бу Гарет ҳақидаги учинчи савол. Мен уни ва барчани ҳурмат қиламан. Бундай гаплар кийиниш хонасида қолиши керак.

— Зидан мураббийлигидаги «Реал»да Гаретнинг келажаги борми?

— Билмайман, у «Реал» ўйинчиси, ҳеч нарса ўзгармайди ва мен буни ҳурмат қиламан. У ўйнамасликни маъқул кўрди ва бу сизга айтишим мумкин бўлган ягона нарса. Биз бор эътиборни «Манчестер Сити»га қарши ўйинга қаратганмиз, — дейди Зидан.

«Манчестер Сити» ва «Реал» жамоалари ўртасидаги ўйин Тошкент вақти билан 7 августдан 8 августга ўтар кечаси 00:00 да бошланади. Эслатиб ўтамиз, мазкур жамоаларнинг Мадриддаги ўйинида «Манчестер Сити» 2:1 ҳисобида ғалаба қозонган.

Зинедин Зиданнинг «Реал» сафида урган қойилмақом 20 та голини томоша қилинг (видео)