АОКАда 5 август куни ўтказилган матбуот анжуманида Коронавирусга қарши кураш штаби аъзоси Лазиз Тўйчиев сўнгги пайтларда баҳс-мунозараларга сабаб бўлаётган «Гидроксихлорохин» («Плаквенил») препарати бўйича ўз фикрларини билдирди. Бу ҳақда «Дарё» мухбири хабар бермоқда.

Фото: UzReport

«Шу кунларда ‘Гидроксихлорохин’ тўғрисида жуда кўп музокаралар бўляптики, ‘Нима учун бу препарат яна протоколга киритилди?’, ‘Нима сабабдан ҳар битта поғонада шу дори воситасидан ичиш керак?’, деган турли гап-сўзлар туғиляпти. Биз ўзимизга савол беришимиз керак, бундан ким манфаатдор, ким бу ерда манфаат кўряпти?

Ҳозирги кунгача ишлатиб келинган ‘Гидроксихлорохин’ ва унинг аналоглари Ҳиндистон, Польша ва келгусида Туркиядан келадиган бўлса, буларнинг ҳаммаси тўлалигича гуманитар ёрдам. Бу ерда ҳеч қандай молиявий қизиқиш йўқ. Бу бевосита беморлар аҳволини яхшилаш ва енгил ҳолат оғирлашмаслиги учун тақдим этиляпти. Демак, бундан бемор манфаатдор бўлмоқда. Биз янги қўлланмамизда ҳам ‘манфаатдор бемор – манфаатдор фуқарo’ деган мақсадни қўйдик», —деди Тўйчиев.