«Гидроксихлорохиннинг коронавирусга қарши самараси бирор мукаммал тадқиқотда исботланмаган» — Энтони Фаучи

АҚШ бош инфекционисти Энтони Фаучи 31 июль куни Конгресснинг Вакиллар палатасида коронавирус инқирози бўйича тузилган комиссия олдида ҳисобот берди. Эшитув давомида конгрессменлар ундан гидроксихлорохин препаратини COVID-19 терапиясида қўллаш масаласи ҳақида ҳам сўраган, деб хабар бермоқда «Kun.uz».

Энтони Фаучининг таъкидлашича, янги коронавирусдан даволашда гидроксихлорохинни қўллашнинг самарадорлиги ҳозиргача «олтин стандарт»га асосланган тадқиқотларда бирор марта исботланмаган. У, жумладан, Ҳенри Форд госпитали томонидан ўтказилган ва гидроксихлорохин COVID-19’дан ўлим даражасини камайтириши ҳақида хулоса берилган тадқиқот натижасини тан олмаслигини қайд этиб ўтган.

Фаучининг сўзларига кўра, ушбу тадқиқотни камчиликлардан холи эмас. Хусусан, мазкур клиник синовларда гидроксихлорохин берилган беморлар бир вақтнинг ўзида кортикостероидлар ҳам қабул қилган.

«Биз бошқа бир тадқиқотдан биламизки, кортикостероидлар касалликнинг сўнгги босқичидаги беморлар орасида ўлим даражасини камайтиришда ёрдам беради», — деди мутахассис. Унинг қайд этишича, беморларнинг тасодифий танланишига асосланган ва плацебо эффекти назоратга олинган тадқиқотларнинг ҳеч бирида гидроксихлорохин коронавирусдан самарали экани ҳақида хулосага келинмаган.

«Қачондир мана шу талабларга жавоб берувчи тадқиқотлар гидроксихлорохиннинг самарасини тасдиқласа, мен биринчилар қаторида уни тан олиб, доридан фойдаланишни қўллаб-қувватлайман», – деди у.

Энтони Фаучи — АҚШ Аллергик ва инфексион касалликлар миллий институти директори, Оқ уйдаги коронавирусга қарши кураш ишчи гуруҳи аъзоси. 79 ёшли мутахассис пандемия даврида дунёнинг энг етакчи экспертларидан бири сифатида ном қозонган. Коронавирус тарқалишининг илк даврларида The New Yorker ва The New York Times нашрлари Фаучини АҚШдаги энг ишончли тиббиёт олимларидан бири сифатида эътироф этган эди.

COVID-19 терапиясидаги таъсири шубҳа остида бўлган гидроксихлорохин Жаҳон соғлиқни сақлаш ташкилоти тавсияларидан чиқарилган, кўплаб давлатлар коронавирус беморларини даволашда ундан фойдаланишни тўхтатган. Коронавирусни даволаш бўйича Ўзбекистонда амал қилаётган сўнгги протоколдан ҳам гидроксихлорохин олиб ташланган. Шундай бўлса-да, препарат уйда даволанаётган беморларга бепул бериладиган дорилар тўпламида бор.