Тошкент шаҳрида коронавирусга чалинган икки нафар бемор — пойтахтлик 43 ёшли эркак ва 57 ёшли аёл вафот этди. Бу ҳақда Соғлиқни сақлаш вазирлиги хабар берди.
Биринчи қурбон. Тошкент шаҳар Учтепа туманида яшаган 43 ёшли Р.А. исмли эркак 27 июль куни оғир ҳолатда Тошкент тиббиёт академиясининг клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир респиратор дистресс синдроми, ўткир нафас ва полиорган етишмовчилиги асоратлари билан кечган.
Бундан ташқари, бемор юрак ишемик касаллиги, стабил стенокардия каби ҳамроҳ хасталиклар билан ҳам оғриган. Бемор ўткир нафас, юрак қон-томир ва полиорган етишмовчилигидан вафот этган.
Иккинчи қурбон. Пойтахтлик 57 ёшли Р.К. исмли аёлда 21 июль куни COVID-19 коронавирус инфекцияси борлиги тасдиқланган ва у шифохонага ётқизилган.
Беморга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир юрак қон-томир ва нафас етишмовчилиги, инфексион токсик шок асоратлари билан кечган.
Шунингдек, унда юрак ишемик касаллиги, стабил зўриқиш стенокардияси, гипертония каби ҳамроҳ хасталиклар ҳам бўлган.
Аёл ўткир нафас ва юрак қон-томир етишмовчилиги, ўткир респиратор дистресс синдроми, инфексион токсик шокдан вафот этган, дейилади ССВ ахборотида.
ССВ ҳисобига кўра, коронавирус қурбонлари сони 153 нафарга етди. «Дарё» ҳисоби бўйича коронавирус асоратлари оқибатида вафот этганлар сони 161 нафарни ташкил этмоқда.
Изоҳ (0)