Ҳозирги кунда бутун республика бўйича коронавирус инфекциясини юқтирган ҳомиладор аёллар учун 210 та туғруқхоналарда 4 400 дан ортиқ ўринга эга ихтисослаштирилган туғруқ мажмуалари ташкил этилган, шулардан 400 га яқини Тошкент шаҳрида. Уларда жами 3 700 нафар шифокорлар, жумладан, 2 500 нафари акушер-гинеколог, 1200 нафари неонаталог фаолият олиб бормоқда.
Бу ҳақда Коронавирусга қарши курашиш штаби аъзоси Барно Абдусаматова АОКА ҳузурида ташкил этилган брифингда айтиб ўтди.
Шунингдек, мутахассис аҳолидан келган «Ижтимоий тармоқларда туғруқхонага келаётган аёллардан тест топшириб келиш талаб қилинаётган ҳолатлар ҳақида маълумотлар учрамоқда, тест натижасини бермагунча қабул қилинмаяптими?», деган саволга мутахассис қуйидагича изоҳ берган:«Бу нотўғри фикр. Чунки ҳар бир ҳомиладор аёлга биз ёрдам кўрсатишимиз зарур. Агар ушбу ҳолатга учрасангиз, ишонч телефонларига мурожаат этишингиз мумкин. Ҳар бир туғруқхона ҳомиладорларни коронавирус тести натижасисиз қабул қилиши шарт», — деди Барно Абдусаматова.
Айни пайтда Ўзбекистонда умумий аҳолининг коронавирусдан касалланиш кўрсаткичида ҳомиладорлар 0,03% ни ташкил этади. Уларнинг асосий қисми ҳамроҳ касалликлари мавжуд аёллар. Ҳамроҳ касалликлардан холи, фақатгина вируснинг ўзи билан оғриган ҳомиладорлар орасида шу вақтгача ўлим кўрсаткичи кузатилмаган.
Абдусаматованинг сўзларига кўра, Ўзбекистонда вирусга чалинган аёллардан туғилган чақалоқ коронавирус инфекциясига туғруқдан 12-24 соат ўтгач текширилади. Натижаларни тасдиқлаш учун такрорий тест 24 соатдан кейин амалга оширилади. Текширув учун биоматериал сифатида бурун-ҳалқум ёки оғиз-ҳалқумдан суртма олинади.
Мавзуга доир:
- Коронавирусга чалинган оналар фарзандини эмизиши мумкинлиги маълум қилинди
- Ҳомиладор аёллар коронавирусдан қандай сақланиши керак?
- Ўзбекистонда коронавирусга чалинган ҳомиладор аёллар учун қандай шароитлар яратилган? ССВ жавоб берди
- Ниқоб тақиб бўлмайдиган кичик ёшли болаларни коронавирусдан қандай ҳимоялаш керак? Мутахассис жавоби
Изоҳ (0)