Тошкент вилояти ҳокимлиги тошқиндан зарарланган Оқолтин туманидаги 128 та хонадонга 1 бошдан қорамол топширмоқда

Сардоба сув омборининг ўпирилиши натижасида юз берган сув тошқинидан зарар кўрган Оқолтин туманидаги 128 та хонадонга бир бошдан қорамол тарқатилди. Бу ҳақда Тошкент вилояти ҳокимлиги ахборот хизматига таяниб, «Kun.uz» хабар берди.

Таъкидланишича, Қурбон ҳайити муносабати билан Тошкент вилоят ҳокимининг ташаббусига кўра сув тошқинидан катта зарар кўрган, мутасадди идоралар томонидан моддий кўмакка муҳтож деб топилган 128 та хонадонга бир бошдан қорамол топширилиши белгиланди.

Ҳозиргача 70 та хонадонга бир бошдан қорамол топширилган бўлса, яна 58 та хонадонга ажратилган қорамоллар яқин кунларда ўз эгаларига етказилиши режалаштирилган.

Маълум қилинишича, Сирдарё вилоятининг сув тошқинидан талафот кўрган ҳудудларида уй-жойларни тиклаш ишлари айни якунланиш арафасида турибди. Сув тошқинидан зарар кўрган 17 гектар майдондаги 132 та хонадонни таъмирлаш Тошкент вилояти зиммасига юклатилган. Ҳозирга қадар вилоятда ушбу вазифа 85 фоизга бажарилган.

Қурилиш ва таъмирлаш ишларини жадаллаштириш мақсадида қурилиш ишлари 2 сменада ташкил этилган. Вилоят «Ягона буюртмачи хизмати» инжиниринг компанияси томонидан ажратилган зарурий маблағлар билан ҳозирда 17 та қурилиш-пудратчи ташкилоти қурувчилари томонидан айни пайтда ҳудудни ичимлик ва оқова сувлар билан таъминлаш, ички йўлларни қайта бунёд этиш ишлари якунланиб, ҳозирда ободонлаштириш, кўкаламзорлаштириш ишлари олиб борилмоқда.

2020 йил 31 июль ҳолатига кўра, 128 та хонадоннинг том қисмини профнастил қопламаси билан қоплаш ва пол ўрнатиш ишлари якунланди. Хонадонларнинг ташқи деворлари базалт плитаси билан, фасад қисми эса травертин қопламаси билан қопланди. Айни пайтда 120 хонадонда ички пардозлаш ишлари якунланган бўлиб, қолган 8 тасида давом эттирилмоқда. Ҳар бир хонадон ичимлик суви ва табиий газга уланмоқда. Шунингдек, тошқиндан зарар кўрган йўллар тўлиқ таъмирланмоқда.

Ҳозиргача тўлиқ қурилиш-монтаж ишлари якунланган 118 та хонадон эгаларига яшаш учун топширилган. Қолган уйлар 2020 йилнинг 5 августида фойдаланишга топширилиши кўзда тутилган.

Эслатиб ўтамиз, Сардоба сув омбори тўғони ўпирилиши иши бўйича тўққиз киши қамоққа олинган.